Avtobýstar apaty: Elorda polıtseıleri tergeý amaldaryn bastady
NUR-SULTAN. QazAqparat - Elordadaǵy iri kólik apaty boıynsha polıtsııa tergeý amaldaryn bastady, dep habarlaıdy QazAqparat tilshisi.
«QR Qylmystyq kodeksiniń «Eki nemese odan da kóp adamnyń ólimine alyp kelgen jol júrý erejesin buzý» baby boıynsha sotqa deıingi tergeý amaldary bastalyp ketti. Osy oraıda barlyq qajetti saraptamalar taǵaıyndaldy. Atap aıtqanda, tehnıkalyq, sot-medıtsınalyq tekserýler júrgiziledi. Polıtseıler atalǵan kólik apatynyń barlyq mán-jaıyn anyqtap jatyr», - delingen Polıtsııa departamentiniń málimetinde.
Budan buryn habarlanǵandaı, elordadaǵy jantúrshigerlik kólik apatynan zardap shekkender sany 27-ge jetti.
26 naýryz kúni Uly Dala men Qabanbaı batyr dańǵyly qıylysynda úsh avtobýstyń jáne jeńil kólikterdiń qaqtyǵysýymen jol-kólik oqıǵasy oryn aldy. Qala mańy baǵdaryndaǵy № 301 avtobýs № 12 baǵdardaǵy jolaýshylar avtobýsymen soqtyǵysty. Osynyń ekpinimen olar № 53 avtobýsqa jáne jedel járdem kóligine baryp soǵyldy.
