Avtobýstan balanyń qulap qalýy: CTS oqıǵaǵa túsinikteme berdi
NUR-SULTAN. QazAqparat - City Transportation Systems (burynǵy «Astana LRT») kompanııasy áleýmettik jelidegi elorda turǵynynyń shaǵymyna qatysty túsinikteme berdi, dep habarlaıdy QazAqparat.
Aıta keterligi, Facebook-tegi «Astana, hochý pohvalıt/pojalovatsıa» tobynda jazba qaldyrǵan Alma Berkembaeva esimdi jeli qoldanýshy qoǵamdyq avtobýstyń ýaqytynda kelmeýi saldarynan jumysyna 1,5 saǵat keshikkenin jazǵan bolatyn.
«24 jáne 24A baǵdaryndaǵy avtobýs 50 mınýt bolmaǵan. Adamdar jumysyna keshigip, avtobýstaǵy oryn úshin tóbelesip qalǵan. Bul endi masqara ǵoı. Dál osy ýaqyt aralyǵynda jartylaı bos 104-shi júrdek baǵdar avtobýsynyń úsheýi ótken. Mundaıǵa qalaı jol berýge bolady? Bul birinshi ret emes. Tańerteńgi jáne keshki qaýyrt ýaqytta balalardy aıtpaǵannyń ózinde eresekter birin-biri taptap kete jazdaıdy», - dep jazdy ol.
Onyń sózine qaraǵanda, avtobýs júrgizýshileri keı ýaqytta aıaldamaǵa toqtamaı ketedi. Sebebi kólik ishine adam lyq tolýy saldarynan esigi de ashylmaı qalady.
«Aıtpaqshy, áriptesim aıaldamaǵa saǵat 8-30-da kelgenimen kelesi avtobýsqa saǵat 9-25-te ǵana otyra alǵan», - dedi áleýmettik jeli qoldanýshy.
Osy máselege qatysty City Transportation Systems kompanııasynyń baspasóz qyzmeti túsinikteme berdi.
«Atalǵan ýaqytta bul aıaldamada avtobýs saǵat 8-30-da jáne 9-04-te bolǵan. Kestege sáıkes, saǵat 8-55-te taǵy bir avtobýs bolýy tıis edi. Alaıda, tehnıkalyq aqaýǵa baılanysty avtobýs jelige jiberilgen joq. Sonyń saldarynan saǵat 8-30-ben 9-04 aralyǵyndaǵy avtobýsty kútý uzaqtyǵy 34 mınýt boldy. Atalǵan avtobýs aqaýy joıylǵannan keıin tústen keıin ǵana jelige shyqty. Bul rette atalǵan baǵdardaǵy avtobýs qozǵalysynyń josparly qozǵalys aralyǵy 10-20 mınýtty quraıdy», - dedi kompanııadan.
Kompanııa málimetinshe, búgin 24, 24A baǵdarynda jolǵa shyqqan avtobýstardyń sany jospardyń 88 paıyzyn quraǵan.
«Qazirgi ýaqytta bul baǵdarda avtobýstardy tolyqtaı jelige shyǵarý máselesi qarastyrylyp jatyr», dep atap ótedi kompanııanyń baspasóz qyzmeti.
