Avtobýstaǵy jolaqy quny bir jylda 8,1 paıyzǵa qymbattaǵan
ASTANA. QazAqparat - Qazaqstanda avtobýspen jolaqy quny bir aıda 3,2%-ǵa, bir jylda - 8,1%-ǵa qymbattady, dep habarlaıdy energyprom.kz.
Shilde aıynyń qorytyndysyna sáıkes, respýblıka boıynsha qalaishilik avtobýs jolaqysy maýsym aıymen salystyrǵanda 3,2%-ǵa, ótken jylmen salystyrǵanda - 8,1%-ǵa kóterilgen.
Bar bolǵany bir aı ishinde Jezqazǵanda (60 teńgege deıin bir jarym esege), Tarazda - 65 teńgege deıin 18,2%-ǵa jolaqy quny qymbattady. Jyldyq esep boıynsha, QR iri qalalary ishinde Qostanaıda (+33,3%, 80 tg deıin), Petropavlda (+23,1%, 80 tg deıin), Óskemende (+20%, 90 tg deıin) jáne Pavlodarda (+16,7%, 70 tg deıin) jol júrý qunynyń ósýi baıqalǵan.
Odan bólek, 1 tamyzdan bastap ońtústik astanada jolaqy tóleýdiń jańa saralanǵan júıesi engizildi. Buǵan deıin Almatydaǵy jolaqy quny 5 jyl buryn kóterilgen edi, 2012 jyldyń shilde aıynda jolaqy 50 teńgeden 80 teńgege deıin qymbattaǵan.
Endi Almatynyń qoǵamdyq kólikterindegi jol júrý aqysy (avtobýstar men trolleıbýstarda ǵana emes) tólem túrine baılanysty bolmaq: aqshalaı tólese - 150 teńge, «Ońaı» biryńǵaı kólik kartasymen, bank kartasymen nemese SMS quralymen - burynǵysha 80 teńge tólenedi. Bul júıe aqshanyń kóleńkeli aınalymynyń aldyn alyp, qazynaǵa túsetin salyq kólemin arttyrý maqsatynda engizilgen. Barlyq jeńildikter ózgerissiz qaldy, tek kópbalaly analar, zeınetkerler, mektep oqýshylary jáne stýdentter «Ońaı» jeńildik kartasymen 40 teńge tóleıdi. UOS ardagerleri, 75 jastan asqan zeınetkerler, І jáne ІІ toptaǵy múgedekter jáne 18 jasqa deıingi múgedek balalar qoǵamdyq kólikterinde tegin júredi.
Almaty qalalyq Jolaýshylar tasymaly kóligi jáne avtomobıl joldary basqarmasynyń basshysy Maqsut Isahovtyń aıtýynsha, saralanǵan tarıf engizilgen alǵashqy kúni-aq qoǵamdyq kólikti paıdalanǵan jolaýshylardyń sany 28 paıyzǵa ósken, al «Ońaı» kartalary boıynsha tranzaktsııalar sany 48 paıyzǵa kóbeıgen.
Avtobýstar eldegi barlyq qalalyq jolaýshylar tasymalynyń 81,9%-yn qamtamasyz etken: alǵashqy jartyjyldyqta avtobýstar 8,86 mlrd jolaýshyny tasymaldaǵan, bul ótken jylǵy kezeńmen salystyrǵanda 1,2%-ǵa kóbirek. Tanymaldylyǵy jaǵynan ekinshi orynǵa jaıǵasqan kólik túri - taksı (jolaýshylardyń 17,7%-y), alaıda taksı tasymaldaǵan jolaýshylar kólemi bir jylda 0,6%-ǵa azaıǵan. Ekologııalyq trolleıbýstar (bir jylda +14%) jáne metro (+7,6%) jolaýshylarynyń kólemi de artyp keledi. Alaıda, kóliktiń bul túrleri jalpy tasymaldyń 0,2% ǵana quraıdy.
Avtobýstyq tasymaldardan túsken kásiporyndardyń tabystary bir jylda 3,3%-ǵa, 2017 jyldyń alǵashqy jartyjyldyǵynyń qorytyndysy boıynsha 43,2 mlrd teńgege deıin ósken. Bul QR qalalyq kólik tasymaldarynan túsken jalpy tabystyń 92,2%-yn quraıdy. Salystyryp qarar bolsaq, taksı tabystary ótken jylmen salystyrǵanda 31,6%-ǵa azaıǵan.
