Avtobýstaǵy órtten qaza tapqandar Aqtóbeniń máıithanasyna jetkiziledi
AQTÓBE. QazAqparat - Aqtóbe oblysy, Yrǵyz aýdany, Qalybaı aýylyna jaqyn mańda bolǵan órt kezinde qaza bolǵandardyń denesi oblys ortalyǵyna jetkiziledi. Bul týraly QazAqparat tilshisi oblys ákiminiń baspasóz qyzmetine silteme jasap habarlaıdy.
Avtobýs órtinen soń arnaıy top Yrǵyz aýdanynyń Qalybaı aýylyna ketti. Qazirgi ýaqytta qaladaǵy máıithanalar múrdelerdi qabyldaýǵa daıyndalyp jatyr.
«Oblys ákimdigi Yrǵyz aýdanynyń ákimdigimen birlesip zardap shekkenderge medıtsınalyq, psıhologııalyq jáne ózge de qajetti kómekterdi kórsetip jatyr.
Aqtóbe qalasyndaǵy máıithana qaıtys bolǵandardyń múrdelerin qabyldaýǵa daıyndaldy. Sonymen qatar, múrdelerdi Aqtóbe qalasyna jetkizetin kólik ázir. Al órttiń sebebin anyqtaý úshin tótenshe jaǵdaı ornyna ІІD-niń jedel-tergeý toby, synaqtyq órt zerthanasy, jyljymaly jylytý beketi jiberildi. Tótenshe jaǵdaı aýmaǵyndaǵy kólik qozǵalysy retteledi jáne sol oryn qorshaýǵa alyndy. Oqıǵa bolǵan jerge oblys ákiminiń orynbasary S.Tólenbergenov, TJD bastyǵynyń orynbasary E.Ótegenov, oblys prokýrorynyń orynbasary D.Syzdyqov, protsessýaldy prokýror O.Orynbasaruly, oblystyq ІІD basshysynyń orynbasary E.Qalıaqparov ketti. Bul oqıǵa oblys ákimdiginiń únemi baqylaýynda», - dep habarlady Aqtóbe oblysy ákiminiń baspasóz qyzmeti.
Aıta keteıik, búgin tańerteń bolǵan órt kezinde 52 jolaýshy qaza boldy, bes adam aman qaldy. Qazir olar oblys oblystyq jedel járdem aýrýhanasynda em qabyldap jatyr. Barlyǵy 57 adam Shymkent qalasynan Reseıdiń Qazan qalasyna barmaq bolǵan. Aman qalǵan bes adamnyń úsheýi kólik júrgizýshisi, ekeýi jolaýshy.
