Avtobýsta jalǵan qujatpen júrgen elordalyqtyń ústinen qylmystyq is qozǵaldy
ASTANA. QazAqparat - «Astana LRT» JShS kóliktik baqylaý departamentiniń ınspektorlary 51-baǵdardaǵy avtobýstan jasyna baılanysty járdemaqy alýshynyń jalǵan kýáligin kórsetken jolaýshyny áshkereledi, dep habarlaıdy QazAqparat mekemeniń baspasóz qyzmetine silteme jasap.
Inspektorlar qujattyń jalǵan ekenin Zeınetaqy tóleý jónindegi memlekettik ortalyqtyń derek-qorynan tekserý arqyly anyqtaǵan.
«Astana LRT» JShS kóliktik baqylaý departamentiniń ınspektorlary bılet berýi tıis kondýktorlar men jolaýshylardy tekseredi. Kezekti tekserý barysynda ınspektorlar 51-baǵyt avtobýsynan jasyna baılanysty zeınetaqy/járdemaqy alýshynyń jalǵan kýáligin kórsetken jolaýshyny áshkereledi jáne polıtsııa shaqyrdy», - delingen kompanııanyń saıtynda.
Jalǵan qujat kórsetken qala turǵynyna qatysty Esil aýdandyq ІІB-de QR Qylmystyq Kodeksiniń 385-baby, 1-bóligi boıynsha sotqa deıingi tergeý jumystary bastaldy. Kodekske sáıkes, jalǵan qujattardy qoldan jasaýǵa eki myń aılyq eseptik kórsetkishke deıingi mólsherde (2018 jyly 4 810 000 teńge) aıyppul salynady nemese sol mólsherde túzeý jumystaryna nemese eki jylǵa deıingi merzimge bas bostandyǵyn shekteýge nemese bas bostandyǵynan aıyrý jazasy beriledi.
«Sondaı-aq, 2017 jyldyń jeltoqsan aıynda «Astana LRT» JShS kóliktik baqylaý departamenti OLX.kz saıty arqyly jalǵan zeınetaqy/járdemaqy alýshy kýáligin satyp kelgen ózge turǵyndy anyqtaǵan edi. Oǵan qatysty QR Qylmystyq Kodeksiniń 385-baby, 2-bóligi boıynsha qylmystyq is qozǵaldy. Mundaı zań buzýshylyqty birneshe ret nemese adamdar tobynyń aldyn ala sóz baılasýymen jasaǵandarǵa tórt myń AEK-ke deıingi mólsherde aıyppul salynady nemese sol mólsherde túzeý jumystaryna nemese tórt jylǵa deıingi merzimge bas bostandyǵyn shekteýge nemese bas bostandyǵynan aıyrý jazasy taǵaıyndalady», - dep jazdy Astana LRT.
Qazirgi ýaqytta tergeý jumystary júrip jatyr.
«2018 jyldyń basynan bastap, jol aqysyn tóleýdiń elektrondy júıege ótýine baılanysty, jeńildik sanatyna jatatyn elordanyń barlyq turǵyndary elektrondy kólik kartpsyn alýy tıis. Alaıda, ázirge elektrondy kartalarmen qatar, qaǵaz kýálikter de óz kúshinde. Bul jaǵdaıdy jolaqysyn únemdegisi keletinder paıdalanyp otyr. Jeńildik sanatyndaǵy Astananyń barlyq turǵyndaryn ataýly kóliktik karta alýǵa shaqyramyz», - dep málimdedi Astana LRT.
