Avtobýsta jalǵan qujatpen júrgen elordalyqqa 700 myń teńge aıyppul qaýpi tóndi
ASTANA. QazAqparat - Astana qalasynyń №2 Esil aýdandyq soty qoǵamdyq kólikte tegin júrý úshin jalǵan qujatty qoldanǵan turǵynǵa úkim shyǵardy, dep habarlaıdy QazAqparat tilshisi «Astana LRT» kompanııasyna silteme jasap.
Tergeý materıaldaryna sáıkes, 1977 jyly týǵan áıel 2016 jyly jalǵan zeınetkerlik kýálikti 25 myń teńgege satyp alǵan. Onyń zańǵa qaıshy áreketi QR Qylmystyq Kodeksiniń 385-baby, 3-bóliginde (jalǵan qujatty paıdalaný) qarastyrylǵan.
«Atalǵan bapqa sáıkes, quqyqbuzýshylyq úshin 300 AEK-ke deıin (2018 jyly 721 500 teńge) aıyppul salý, túzetý jumystaryna nemese 200 saǵatqa deıin qoǵamdyq jumysqa tartý nemese 75 táýlikke qamaýǵa alý jazalary kózdelgen. Sot úkim shyǵararda birqatar jaǵdaıdy eskerdi: sottalýshy óz aıybyn tolyq moıyndap, ókinish bildirdi, buryn sottalmaǵan. Astanalyq turǵyn aıypty dep tanylyp, oǵan 60 saǵatqa qoǵamdyq jumysqa tartý túrinde jaza taǵaıyndaldy», - dep habarlady «Astana LRT».
Sondaı-aq, aıypker is boıynsha júrgizilgen saraptamalar úshin memleketke 31 296,18 teńge tóleıdi.
Eske sala ketsek, aqpan aıynda «Astana LRT» JShS kóliktik baqylaý departamentiniń ınspektorlary 51-baǵdardaǵy avtobýstan zeınet jasyna baılanysty járdemaqy alýshynyń jalǵan kýáligin kórsetken jolaýshyny áshkereledi.
Sonymen birge, málim etilgendeı, habarlandyrý saıttary arqyly jalǵan zeınetkerlik kýálikterdi satqan Astana turǵynyna qatysty sot otyrysy ótken.
«Astana qalasyndaǵy №2 Almaty aýdandyq soty 2016 jyldyń qańtar aıynda aıypkerlerdiń biri qoǵamdyq kólikterde tegin júrý úshin jalǵan kýálik satyp alǵanyn anyqtady. 2017 jyldyń qazan aıynda eki áıel jalǵan zeınetkerlik kýálikterdi jasap, satylymǵa shyǵarýdy uıymdastyrǵan. Olardyń biri «Azamattarǵa arnalǵan úkimet» kommertsııalyq emes AQ fılıaly - «Vedomstvoaralyq áleýmettik tólemder esep ortalyǵy» departamentinde jumys istegen jáne departamenttiń joǵalǵan mórtańbasyn ıemdengen», - dep atap ótti «Astana LRT».
Olarǵa 9 mln 620 myń teńge kóleminde aıyppul nemese túzeý jumystary nemese 4 jylǵa deıin bas bostandyǵynan aıyrý jazalarynyń biri taǵaıyndalýy tıis edi. Sot eki áıeldiń kámelet jasqa tolmaǵan balalary baryn eskerip, 2 jylǵa bas bostandyǵynan aıyrý jazasyn bekitti.
«2018 jyldyń basynan bastap, jol aqysyn tóleýdiń elektrondy júıege ótýine baılanysty, jeńildik sanatyna jatatyn elordanyń barlyq turǵyndary elektrondy kólik kartasyn alýy tıis. Alaıda, ázirge elektrondy kartalarmen qatar, qaǵaz kýálikter de óz kúshinde. Bul jaǵdaıdy jolaqysyn únemdegisi keletinder paıdalanyp otyr. Jeńildik sanatyndaǵy Astananyń barlyq turǵyndaryn ataýly kóliktik karta alýǵa shaqyramyz», - dep málimdedi Astana LRT.
