Avtobýsta kondıtsıoner qosylmaǵan jaǵdaıda qaıda shaǵymdanýǵa bolady
ASTANA. QazAqparat – «№1 Avtobýs parki» AQ basqarma tóraǵasy Medet Shaqaev ystyq kúnderi kondıtsıonerleri qosylmaǵan avtobýstarǵa qatysty túsinik berdi, dep habarlaıdy QazAqparat tilshisi.
«Qazirgi kezde qalada jolaýshylar tasymalymen 6 avtobýs parki aınalysyp keledi. Onyń arasynda №1 Avtobýs parkimiz memlekettik kásiporyn sanalady, al qalǵany jekemenshikte. Bizdiń avtobýs parkindegi jaǵdaıǵa toqtalsaq, kondıtsıoneri durys istemeıtin kólikter tańerteń baǵdarǵa shyǵarylmaıdy. Avtobýs jolda kele jatqanda kondıtsıoner isten shyǵýy múmkin. Bul jaǵdaıda avtobýs sońǵy aıaldamaǵa jetken soń marshrýttan shyǵyp, bazaǵa barady. Sol kúni kondıtsıonerdi jóndegennen keıin, avtobýs qaıta jolǵa shyǵady», - dedi M. Shaqaev Astana qalasynyń kommýnıkatsııalar qyzmetindegi baspasóz máslıhatynda.
Ol ár avtobýsta júrgizýshiniń aty-jóni jáne basqa da derekteri arnaıy ilinetinin eske saldy. Eger qyzmetkerler jumysyna shaǵymdar bolsa, qala turǵyndary 109 qyzmetine (iKomek) habarlasa alady.
«iKomek-ke túsken barlyq shaǵym mindetti túrde qaralady. Biz shaǵymdardy qarastyryp, tártiptik jaza boıynsha shara qabyldaımyz», - dedi kásiporyn basshysy.
Aıta keteıik, qalada 6 avtobýs parki qyzmet kórsetip jatyr. Kún saıyn elorda kóshelerinde 850-den astam avtobýs júredi. «№1 Avtobýs parki» elordanyń búkil marshrýttyq jelisiniń shamamen 70 paıyzyn qamtıdy, ıaǵnı 38 qalalyq baǵdarǵa jáne 28 qala mańyndaǵy baǵdarǵa (100%) qyzmet kórsetip keledi.
