Avtobýsta erekshe balanyń anasyna urysqan áıel: Bala quqyǵyn qorǵaý komıteti málimdeme jasady
ASTANA. KAZINFORM – Áleýmettik jelide qoǵamdyq kólik ishinde eresek áıeldiń erekshe qajettiligi bar balaǵa kemsitýshilik sıpattaǵy sózder aıtqan beınejazbasy taraǵan bolatyn. QR Oqý-aǵartý mınıstrligi Balalardyń quqyqtaryn qorǵaý komıteti osy jaǵdaıǵa qatysty túsinik berdi.
Komıtet bul oqıǵany úlken alańdaýshylyqpen qabyldaǵanyn jáne atalǵan jaǵdaı adamgershilik pen quqyqtyq normalarǵa qaıshy keletin áreket ekenin atap ótti.
– Mundaı kózqaras qoǵamymyzda múlde bolmaýy tıis. Qazir beınematerıalda kórinis tapqan azamatshanyń jeke basy anyqtalý ústinde. Balalardyń quqyqtaryn qorǵaý, olardyń teń múmkindikterge ıe bolýyn qamtamasyz etý jáne ınklıýzıvti bilim berýdi damytý – Oqý-aǵartý mınıstrliginiń basty baǵyttarynyń biri. Árbir bala, onyń damý ereksheligine qaramastan, qurmetke, qorǵaýǵa jáne qoǵam ómirine tolyqqandy qatysýǵa quqyly. Barsha qoǵam múshelerin, ásirese eresekterdi, balalardyń ar-namysyn taptamaýǵa, olardyń quqyqtaryn qatań saqtaýǵa jáne árdaıym qaýipsiz ortany qamtamasyz etýge shaqyramyz. Balanyń múddesi – memlekettiń bilim berý salasyndaǵy saıasatynda basty orynda turatyn qundylyq, - delingen Balalardyń quqyqtaryn qorǵaý komıteti habarlamasynda.
Belgili bolǵandaı, balanyń anasy kómek surap, «AUTISM KAZAKHSTAN» Ulttyq qaýymdastyǵyna habarlasqan.
Aıta keteıik, Ulybrıtanııa Qazaqstannyń bala quqyǵyn qorǵaý baǵytyndaǵy jumysyn erekshe baǵalady.