Avtobýsta 12 jastaǵy qyzǵa tıisken er adam 1 mln teńge moraldyq ótemaqy tóleıdi
NUR-SULTAN. QazAqparat – Elordanyń Saryarqa aýdandyq soty kámeletke tolmaǵan qyzǵa tıisken er azamattan 1 mln teńge moraldyq ótemaqy óndirip alý sheshimin shyǵardy, dep habarlaıdy QazAqparat tilshisi.
Aıta keteıik, bul jaǵdaı bıyl mamyr aıynda Nur-Sultan qalasynda bolǵan. Elorda turǵyny polıtsııa qyzmetkerlerine avtobýsta belgisiz er adam onyń 12 jastaǵy qyzyna tıiskeni týraly shaǵym túsirgen bolatyn . Kúdikti qoǵamdyq kólikte qyzdyń jambasynan sıpaǵan. Ol bul áreketin birneshe ret qaıtalap, oqýshy qyz anasyna vıdeoqońyraý shalǵan sátte ǵana toqtatqan. Qyzdyń anasy oryn alǵan oqıǵa jaıynda polıtsııaǵa shaǵym túsirip, kúdikti ustalǵan edi.
Ol joly er adam Ákimshilik kodekstiń «Usaq buzaqylyq» baby boıynsha 10 táýlikke qamaýǵa alynǵan. Keıin zardap shekken qyzdyń anasy keltirilgen moraldyq zııandy óteý boıynsha sotqa júgingen.
«Kámeletke tolmaǵan jaýap berýshi B. zańsyz áreketi saldarynan moraldyq zardap shekken. Sot qyzdyń anasynyń aryzyn qarap, aıyptalýshydan 1 000 000 teńge moraldyq ótemaqy óndirip alý sheshimin maquldady», - delingen Saryarqa aýdandyq soty shyǵarǵan sheshimde.
Sot sheshimi áli zańdy kúshine engen joq.
