Avtobýspen betpe-bet soqtyǵysqan Olımpıada chempıony aman qaldy
NUR-SULTAN. QazAqparat – Júgirýden eki dúrkin álem chempıony, kenııalyq Devıd Rýdısha iri jol apatynan keıin aman qaldy. Bul týraly 30 jastaǵy sportshy Twitter-akkaýntynda jazdy, dep habarlaıdy QazAqparat.
Kenyans.co.ke aqparatyna sáıkes, Rýdıshıdiń avtokóliginiń dońǵalaǵy jarylyp, saldarynan avtobýsqa soǵylǵan. Sportshy aýrýhanaǵa jetkizilgennen keıin denesinen eshqandaı jaraqattar tabylmaǵan. Artynan jeńil atletshi aýrýhanadan shyǵaryldy.
«Senbi kúni keshkisin men Kılgorıske úıime bara jatqan jolda Kerokede sumdyq jol apatyna tústim. Avtobýspen betpe-bet soǵylyp, aman qaldym. Jaǵdaıym táýir, tipti jaraqat alǵan joqpyn. Duǵa-tilekterińiz úshin rahmet!», - dep jazdy Rýdısha.
Kenııalyq sportshy eki dúrkin olımpıada chempıony (2012 jáne 2016 jyldary) atanǵan, 800 metrge júgirýden 2011 jáne 2015 jyldardaǵy álemdik birinshilikterdiń eki dúrkin jeńimpazy. Ol dál osy qashyqtyqta álemdik rekordty jańartty.
