Avtobýs júrgizýshisi kepilmen bosatýǵa múmkindik beretin qujatty Aqtóbege jetkize almady
AQTÓBE. QazAqparat - Aqtóbede órtengen avtobýs júrgizýshisi Nurjan Qyrǵyzbaev tergeý jumystary aıaqtalǵansha abaqtyda otyrady, dep habarlaıdy QazAqparat tilshisi.
Búgin №2 Aqtóbe qalalyq sotynda órtengen avtobýs júrgizýshisi Nurjan Qyrǵyzbaevty 2 aı qamaýǵa alý týraly sanktsııa berildi. Alǵashynda qorǵaýshy kepilmen bosatý týraly usynysyn aıtty. Biraq kepilge qoıatyn múliktiń qujattary Aqtóbege jetkizilmegen.
«Qazirgi kezde qylmystyq qýdalaý organdary is boıynsha basty dáleldemelerdi jınaqtady. Qyrǵyzbaev sotqa deıingi tergeý jumystaryna qatysty, óz áreketterin tolyq baıandady. Іsine jaýapsyzdyqpen qaraǵanyn túsinip, ókinish bildiredi. Tergeý jumystaryna kómegin berýge ázir. Sondyqtan Qyrǵyzbaevty kepilmen bosatýdy suraımyz. Biraq onyń turǵylyqty jeri shalǵaı, kepilge qoıatyn qujat qolymyzda joq. Qysqa merzimde qujatty jetkizemiz», - dedi Nurjan Qyrǵyzbaevtyń qorǵaýshysy Aman ıÝsýpov.
Bir saǵat keńesý bólmesinde bolǵan sýdıa Álıma Adılova tergeý aıaqtalǵansha kúdiktini ızolıatorǵa qamaýǵa alý týraly sheshim shyǵardy.
«Nurjan Qyrǵyzbaev 1968 jyly Ońtústik Qazaqstan oblysynda dúnıege kelgen. Buryn sottalmaǵan. 18 qańtar kúni Shymkent-Samara tasjolynyń 1068 shaqyrymynda Aqtóbe oblysy Yrǵyz aýdany Qalybaı aýyly mańynda jolaýshylar avtobýsy janyp ketti. Tergeý barysynda avtobýstyń janýyna júrgizýshilerdiń avtokólik quraldaryn paıdalaný qaǵıdalaryn saqtamaǵany, ıaǵnı, avtobýs ishinde otty lampa paıdalanyp, órt qaýipsizdigi erejesin buzǵany anyqtaldy. Nátıjesinde Ózbekstannyń 52 adamy qaza boldy. Jedel tergeý toby kúdikti retinde tanylǵan N. Qyrǵyzbaevty kúzetpen ustaý týraly bultarpaý sharasyn sanktsııalaýdy usyndy. Ótinish hat qanaǵattanyrylyp, 24 naýryzǵa deıin kúzetpeý ustaý týraly bultartpaý sharasy sanktsııalansyn»,- dedi sýdıa A.Adılova.
Aıta keteıik, kúzetpen ustaý týraly bultartpaý sharasyn sanktsııalaý kezinde kúdiktiniń Aqtóbe qalasynda turatyn turaqty mekenjaıy joq, qylmys ortasha aýyr sanatyna jatatyny eskerildi.
Sonymen qatar, qazirgi ýaqytta №2 Aqtóbe qalalyq sotynda júrgizýshi Maqsat Pernebekov, Barat Tańatovty eki aı merzimge qamaýǵa alý sanktsııasy qaralyp jatyr.
