Avtobýs júrgizýshileriniń júgenin tartyp, jónge salý eshkimniń qolynan kelmeı tur - BAQ-qa sholý
***
«Premer-Mınıstr Serik Ahmetovtiń tóraǵalyǵymen ótken keshegi Úkimet otyrysynda ÚIIDMB sheńberinde hımııalyq óndiris salasyn damytý máseleleri qaralyp, sala boıynsha ázirlengen memlekettik baǵdarlamany iske asyrý barysy talqylandy», - dep jazady «Egemen Qazaqstan» gazeti búgingi sanyndaǵy «Hımııa ónerkásibi órkendeı túspek» degen taqyryptaǵy maqalasynda. «Ókinishtisi, hımııalyq óndiris salasynda jumys isteıtin mamandar tapshy. Qazirgi ýaqytta bilikti mamandar jetispeıdi. Osylaısha, 2020 jylǵa qaraı hımııa salasyndaǵy naqty jobalardy júzege asyrý úshin ártúrli biliktiliktegi 15 myńǵa jýyq jumysshy qajet bolady. Onyń ishinde, joǵary bilimdi 3 myńnan, ortasha tehnıkalyq bilimi bar 2 myńnan astam adam kerek, sondaı-aq t.b. kásibı bilimi bar 10 myń bilikti maman qajet», - dep jazady basylym.
Osy basylymnyń jazýynsha, keshe Aqordada Qazaqstan Prezıdenti Nursultan Nazarbaev Birikken Ulttar Uıymynyń Bosqyndar isi jónindegi Joǵarǵy komıssary Antonıo Gýterrıshpen kezdesý ótkizdi. Kezdesýde Qazaqstannyń Bosqyndar isi jónindegi Joǵarǵy komıssar basqarmasymen yntymaqtastyǵynyń negizgi baǵyttary, sondaı-aq, Qazaqstanda bosqyndar quqyǵyn qorǵaýdy qamtamasyz etý máselesi qaraldy. Talqylaý barysynda Nursultan Nazarbaev Qazaqstan Bosqyndar isi jónindegi Joǵarǵy komıssar basqarmasyna jan-jaqty qoldaý kórsetetinin atap ótti. Al A.Gýterrısh Qazaqstan Úkimetine BUU Bosqyndar isi jónindegi Joǵarǵy komıssar basqarmasymen jemisti yntymaqtastyǵy úshin alǵysyn bildirdi. Aqparat «Qazaqstan - 15 myń bosqynǵa pana» degen taqyryppen berilgen.
***
Almaty qalasyndaǵy qylmystyq ister jónindegi mamandandyrylǵan aýdanaralyq áskerı soty «Qorǵas», «Qaljat» jáne «Dostyq» kedendik beketterinde oryn alǵan ekonomıkalyq kontrabanda faktilerine baılanysty qylmystyq istiń materıalyn qarap, aldyn ala sot tyńdaýyn ótkizdi. Osy jaıt arqaý bolǵan maqala «Aıqyn» gazetinde «Qorǵas isi sotqa jetti» degen taqyryppen berilgen. Sonymen, basylymnyń jazýynsha, uzaq ýaqytqa sozylǵan bul qylmystyq isti sotta qaraý maýsymnyń 20-syna belgilendi. Bir jarym myń tomdyq qylmystyq is Almatydaǵy SI-18 tergeý ızolıatorynyń áskerı sotynda ótedi. Іs boıynsha 45 adam aıyptalýshy retinde jaýapqa tartylady, onyń 42-si qamaýda otyrsa, 3-eýinen eshqaıda ketpeý týraly qolhat alynǵan. Al izdeýde júrgen 19-yna qatysty ázirge eshqandaı derek joq. Barlyq sottalýshylarǵa qatysty bultartpaý sharalary ózgerissiz qaldyrylǵan. Bul qylmystyq is óte aýqymdy bolǵandyqtan sot protsesi bir jylǵa deıin sozylýy múmkin.
Asyl metaldar álemdik naryqtardaǵy óziniń baǵasyn biraz tómendetip alǵany alańdaýshylyq týdyrdy. Áıtse de, munyń ýaqytsha ótpeli kezeń ekenin, erteń-aq altynnan salmaqty eshteńe bolmaıtynyn uǵatyndar ony osy arzan kezinde kóptep satyp alýǵa kiristi. Bul jaıynda «Aıqyn» gazetiniń búgingi sanyndaǵy «Arzan kezinde alǵan jón» degen taqyryptaǵy maqalada baıandalǵan. Basylymnyń JP Morgan banki sarapshylaryna silteme jasaýynsha, altyn 2013 jyldyń sońyna qaraı baǵasyn tipti quldyrata túsedi. Onyń bir ýntsııasy 1715-ten 1595 dollarǵa deıin tómendeıdi. «Al Bank of America Merrill Lynch te odan qalyspaı otyr. Altyn baǵasy jyl sońyna deıin-aq quldyraı bastaýy ábden múmkin ekenin alǵa tartqan bank, olarǵa degen suranys pen fýndamentaldi kórsetkishteriniń álsizdigine ıek artýda. Halyqaralyq sarapshylar qandaı boljam jasasa da, óz erikteri ózinde, al biz altynnyń baǵasy arzan bolyp turǵan kezeńdi tıimdi paıdalanyp qalamyz degen nıettegi ortalyq bankter qazynasyndaǵy altyn qoryn molaıta túsýde. Soǵan qarap-aq altynnyń altyn bolyp qala beretinine senim bar», - dep jazady basylym.
***
Avtobýs júrgizýshileriniń júgenin tartyp, jónge salyp, túzý jolǵa túsirý qazir eshkimniń qolynan kelmeı tur. Jolaýshylar ómirine jaýapty ekenin umytyp, jospar qýyp, jol erejesin eskermeı, talaıdyń ómirin qaýipke tigip, tipti keıde adam ólimine sebepshi bolyp jatsa da, aıylyn bir jııar emes. Jol ortasynda jolaýshylardy túsirip-mingizý olar úshin qalypty jaǵdaıǵa aınalǵaly qashan. Bir ǵana Almaty qalasynda aǵymdaǵy jyldyń alǵashqy tórt aıynda avtobýstardyń qatysýymen 69 jol apaty tirkelip, onda eki adam ajal qushyp, 99 adam ártúrli tán jaraqatyn alǵan. Onyń ishinde 48 jaǵdaıda jol-kólik apatyna avtobýs júrgizýshileri kináli dep tabylǵan. Osynaý kúrdeli másele arqaý bolǵan maqala «Alash aınasy» gazetiniń búgingi sanynda «Avtobýs júrgizýshileri qashan aıylyn jııady?» degen taqyryppen berildi.
