Avtobýs júrgizýshileriniń jetispeý problemasy joq – Roman Sklıar
ASTANA. QazAqparat – 466 myńnan astam adamda jolaýshylar kóligin júrgizý quqyǵy bar. Bul týraly Májilis depýtattarynyń saýalyna Premer-Mınıstrdiń birinshi orynbasary Roman Sklıardyń jaýabynda aıtylǵan, dep habarlaıdy QazAqparat tilshisi.
«Qazirgi ýaqytta 466 myńnan astam adam jolaýshylar kóligin júrgizý quqyǵyna («D» sanatyndaǵy júrgizýshi kýáligi) ıe ekenin, bul rette elde tirkelgen avtobýstardyń sany 62,5 myń birlikti quraıtynyn atap ótý qajet. Osylaısha, osy sanattaǵy júrgizýshilerdiń jetispeýiniń problemalyq máseleleri joq. Óz kezeginde, halyqqa qyzmet kórsetý deńgeıin jáne júrgizýshi quramynyń sapasyn arttyrý úshin Іshki ister mınıstrligi tarapynan kásipkerlerge qajet bolǵan jaǵdaıda júrgizýshilerdiń jumys rejımine, olardyń eńbek jaǵdaılaryna, jalaqy deńgeıin arttyrýǵa jáne t.b. qatysty máselelerdi qaıta qaraý usynylady», - dep atap ótedi birinshi vıtse-premer jaýabynda.
Sonymen qatar Roman Sklıar joldardaǵy ólim-jitim deńgeıiniń tómendeýine zardap shekkenderge shuǵyl medıtsınalyq kómek kórsetýdiń sapasy men jedeldigi yqpal etetindigin atap ótedi.
«Osy maqsatta Tótenshe jaǵdaılar mınıstrliginiń 40 trassalyq medıtsınalyq qutqarý pýnkti jumys isteıdi. 28 aýdandyq aýrýhanada kólik quraldarynyń úlken aǵyny bar avtomagıstraldarda ornalasqan aýdanaralyq travmatologııalyq bólimsheler uıymdastyrylǵan»,- dedi ol.
