Avtobýs júrgizýshileriniń jalaqysy qysqarmaıdy – Almaty ákimdigi
ALMATY. QazAqparat – Almatyda jolaýshylar sanynyń azaıýyna baılanysty avtobýs júrgizýshileriniń jalaqysy qysqarmaıdy. Bul týraly qalalyq Mobıldilik basqarmasynyń basshysy Saǵyndyq Telibaev onlaın-brıfıng kezinde aıtty, dep habarlaıdy QazAqparat tilshisi.
«Koronavırýs ınfektsııasynyń taralýyna jol bermeý úshin barlyq avtobýstarda dezınfektsııa jumystary júrgiziledi. Ony mamandanǵan klınıngilik kompanııalar iske asyrady. Qoǵamdyq kólikter ár reısten keıin tolyǵymen zalalsyzdandyrylady», - deıdi basqarma basshysy.
Sonymen qatar, ol jolaýshylardyń azaıýyna qaramastan júrgizýshilerdiń jalaqysy qysqarmaıtynyn aıtty.
«Jolaýshylar sanynyń azaıýy avtobýs júrgizýshileriniń jalaqysyna áser etpeıdi. Olar karantın rejımine deıin qandaı jalaqy alyp kelse, sol kólemde tólenedi. Júrgizýshiler tańerteń jumysqa kirispes buryn medıtsınalyq tekseristen ótedi. Ol jerde qan qysymy, dene temperatýrasy tekseriledi. Eger sol kezde júrgizýshi densaýlyǵynyń nashar ekenin aıtsa, birden jedel járdem shaqyrylady», - deıdi Saǵyndyq Telibaev.
Aıta keteıik, Almaty avtobýstarynda jolaýshylar sany 80 paıyzǵa azaıǵany málim etilgen bolatyn.
