Avtobýs júrgizýshileriniń sharshaǵanyn anyqtaıtyn júıe jasaldy
NUR-SULTAN. QazAqparat - «Astana LRT» JShS qoǵamdyq kólikterdegi apattar sanyn tómendetý úshin «aqyldy» tehnologııalardy engizbek, dep habarlaıdy QazAqparat tilshisi.
«Astana LRT» JShS basqarma tóraǵasynyń orynbasary Beıbit Esjanovtyń aıtýynsha, astanalyq avtoparkterge 725 júrgizýshi qajet. Bul jaǵdaı qoǵamdyq kólikterdiń jol-kólik oqıǵalaryna jıi ushyraýyna óz áserin tıgizýde. «Astana LRT» kompanııasy bul máseleni sheshýdiń balama joldaryn da qarastyrýda. Sonyń biri - «Júrgizýshiniń sharshaǵanyn baqylaıtyn júıe».
IQ Glodal kompanııasy basshysy Erlan Kákenovtiń aıtýynsha, kameramen jabdyqtalǵan arnaıy qurylǵy júrgizýshiniń bet álpetindegi ózgerister arqyly onyń qanshalyqty sharshaǵanyn qadaǵalap otyrady.
«Asa sezimtal qurylǵy júrgizýshi kózildirik taǵyp otyrǵan kúnniń ózinde onyń jaǵdaıyn baqylaı alady. Júıede qandaı da bir ózgeris tirkese, birden dybystyq eskertý jiberedi. Osy arqyly sharshaǵan júrgizýshini reısten bosatýǵa bolady. Bul jobaǵa Almaty men Shymkent qalalary da qyzyǵýshylyq tanytyp otyr» - deıdi kompanııa ókili.
IQ Glodal kompanııasy budan bólek «Aınala» sholý júıesi» jabdyǵyn da usynyp otyr. Onyń kómegimen júrgizýshi aınamen terezeden bólek 360 gradýs aýmaqty qamtıtyn kameranyń kómegine júgine alady.
Beıbit Esjanov bul joba bir aı boıy qala avtobýstarynda synaqtan ótetinin aıtady.
«Bul jobalardy bir aı boıy birneshe avtobýsta kezek-kezegimen synap kóremiz. Bul júıeniń júrgizýshilerge qanshalyqty yńǵaıly, apattardyń aldyn alý qanshalyqty múmkin ekenin anyqtaǵannan keıin ǵana naqty sheshim qabyldanady» - deıdi «Astana LRT» JShS ókili.
Aıta keteıik, 26 naýryzda elordada úlken jol-kólik apaty boldy. Qala mańyna qatynaıtyn 301-shi baǵdardyń ekspress-avtobýsy qatty jyldamdyqpen baǵdarshamda turǵan 12-inshi avtobýsqa soǵyldy. Óz kezeginde 12-avtobýs ekpinmen jedel medıtsınalyq járdem kóligi men taǵy bir avtobýsqa soǵyldy.
Saldarynan 301-shi baǵdardyń júrgizýshisi jáne aldyńǵy orynda otyrǵan bir jolaýshy kóz jumdy. 36 adam zardap shekti.
«Astana LRT» basshysy Bekmyrza Igenberdınov buǵan deıin zardap shekkenderge ótemaqy tólenetinin málim etken bolatyn.
