Avtobýs júrgizýshileriniń kinásinen 37 adam mert boldy
ASTANA. QazAqparat – 2022 jyly avtobýs júrgizýshileriniń kinásinen 37 adam mert boldy. Bul týraly Májilis depýtattarynyń saýalyna Premer-Mınıstrdiń birinshi orynbasary Roman Sklıardyń jaýabynda aıtylǵan, dep habarlaıdy QazAqparat tilshisi.
«2022 jyly avtobýs júrgizýshileriniń kinásinen 382 jol-kólik oqıǵasy oryn alyp, 37 adam qaıtys boldy, 639 adam jaraqattandy. Onyń ishinde jol-kólik oqıǵasynyń 70 paıyzdan astamy turaqty tasymaldaý baǵdarlary bolǵan. Jolaýshylar kóliginiń qatysýymen bolǵan jol-kólik oqıǵalaryn qysqartý jáne jolaýshylardy tasymaldaý qaǵıdalarynyń saqtalýyn baqylaýdy kúsheıtý maqsatynda jyl saıyn kóliktik baqylaý, tótenshe jaǵdaılar jónindegi ınspektsııalarynyń, ákimdikter jáne qoǵamdyq birlestikterdiń qyzmetkerlerin tarta otyryp, «Avtobýs» respýblıkalyq jedel-aldyn alý is-sharasy ótkiziledi», - dep atap ótedi birinshi vıtse-premer jaýabynda.
Úkimet basshysy birinshi orynbasarynyń dereginshe, ótken jyly atalǵan is-sharanyń nátıjesinde qoǵamdyq kólik júrgizýshileriniń 65 myńnan astam jol erejesin buzǵany anyqtaldy. Onyń ishinde mas kúıinde avtobýstardy basqarý, jolaýshylardy zańsyz tasymaldaý, kólik quraldaryn zańsyz qaıta jabdyqtaý, kólikti basqarý kezinde uıaly telefondardy qoldaný syndy faktorlar bar.
«Avtobýs parkteriniń, onyń ishinde halyqaralyq jáne qalaaralyq tasymaldardy júzege asyratyn, 600-den astam laýazymdy tulǵasy ákimshilik jaýapkershilikke tartyldy, 200-den astam ruqsat etilmegen turaqty uıymdastyrý jumysy toqtatyldy. Kóliktik qyzmet kórsetýdi uıymdastyrýdy jaqsartý aıasynda 410 josyqsyz tehnıkalyq baıqaý operatorynyń qyzmeti toqtatyldy. Aıyppul salýmen 270 ákimshilik materıal resimdeldi», - dedi Roman Sklıar.
