Avtobýs jolaqysy 500 teńgege jetýi múmkin be – Úkimet jaýaby

ASTANA. KAZINFORM – Ulttyq ekonomıka vıtse-mınıstri Azamat Amrın qandaı jaǵdaıda qoǵamdyq kóliktegi tarıftiń 500 teńgege deıin ósýi múmkin ekenin aıtty.

Úkimet úıinde ótken brıfıngte jýrnalıster áleýmettik jelide taraǵan avtobýs jolaqysy 500 teńgege deıin ósýi múmkin degen boljamǵa qatysty suraq qoıdy.

Ulttyq ekonomıka vıtse-mınıstri tarıftiń ósýine yqpal etetin jalǵyz ekonomıkalyq alǵyshart – tasymaldaý qunynyń artýy bolýy múmkin ekenin túsindirdi.

– Mysaly, benzın baǵasynyń ósýi. Biraq tarıfti kóterý týraly sheshimdi árbir kompanııa derbes qabyldaıdy. Bul taza kommertsııalyq másele: suranys pen usynysqa baılanysty, – dedi ol.

Óz kezeginde Qarjy vıtse-mınıstri Erjan Birjanov jolaqynyń 500 teńgege deıin kóterilýi týraly málimdeme – jekelegen sarapshynyń pikiri ǵana ekenin atap ótti.

– Árıne, qoǵamdyq kólik halyqqa baǵyttalǵan, sondyqtan jolaqynyń kúrt ósýine jol berilmeıdi. Eger jolaqy baǵasy ósse, memleket tarapynan qoldaý kórsetiledi, – dep tolyqtyrdy E.Birjanov.

Buǵan deıin E.Birjanov Qazaqstanda 45 myń azamattyń 180 mlrd teńge qaryzy keshirilip, bankrottyq jarııalanǵanyn aıtqan edi.

Sondaı-aq, jańa Salyq kodeksi turǵyn úı baǵasyna áser etpeıdi.