Avtobýs jolaǵynda resmı taksopark taksıleri ǵana júre alady
ALMATY. QazAqparat – Almatyda avtobýs jolaǵyna shyǵýǵa tek qana resmı jumys istep jatqan taksopark júrgizýshilerine ǵana ruqsat beriledi. Bul týraly qalalyq mobıldilik basqarmasy basshysynyń orynbasary Qanat Baıqońyrov aıtty, dep habarlaıdy QazAqparat tilshisi.
Almaty ákimdiginiń taksı júrgizýshilerine avtobýs jolaǵyna shyǵýǵa ruqsat bergeni týraly keshe jazǵan bolatynbyz.
Áleýmettik jelide bul taqyryp qyzý talqyǵa tústi.
Osyǵan baılanysty qalalyq mobıldilik basqarmasy resmı túsinik berdi.
«Bul sheshimdi jarııalamas buryn qalalyq basqarma polıtsııa, ákimshilik polıtsııa, jergilikti polıtsııa qyzmeti, taksopark dıspetcherleriniń qatysýymen arnaıy jıyn ótken bolatyn. Bul jıynda quzyrly organdarǵa kóliktiń avtobýs jolaǵyna shyǵý tártibi túsindirildi. Qazirgi tańda ákimdik resmı taksoparkterdiń reestrin jasap jatyr. Bul reestr toqsan saıyn jańaryp turady. Taksopark kólikteri Jol qozǵalysy qaýipsizdigi aqparattyq júıesi, Sergek, Jolaq júıeleriniń kameralar bazasyna tirkeledi. Sondyqtan, avtobýs jolaǵymen ákimdik reestrine tirkelgen, Qazaqstan zańnamasy boıynsha jumys istep jatqan resmı taksopark júrgizýshileri ǵana júre alady», - dedi qalalyq mobıldilik basqarmasy basshysynyń orynbasary Qanat Baıqońyrov.
Ákimdiktiń reestrine tirkelý úshin taksı parkterine qandaı talaptar qoıylatynyn myna siltemeden kórýge bolady.
