«Avtobýs» jedel aldyn alý sharasy: ShQO-da 11 laýazymdy tulǵa jaýapqa tartylǵan
ÓSKEMEN. QazAqparat - Shyǵys Qazaqstan oblysynda «Avtobýs» jedel aldyn alý sharasy barysynda birqatar zańbuzýshylyqtar anyqtalǵan, dep habarlaıdy QazAqparat.
Polıtsııa qyzmetkerleri 15-17 qańtar aralyǵynda avtobýstardyń tehnıkalyq jaǵdaılary men zań talaptarynyń saqtalýyn tekserdi. Nátıjesinde 436 avtobýstyń ishki jylýy, elektr jabdyqtarynyń jaı-kúıi súzgiden ótti. Tártip saqshylary olqylyqqa jol bergen avtobýs parkterindegi 11 laýazymdy tulǵany ákimshilik jaýapkershilikke tartqan. Sondaı-aq 17 avtobýs aıyppul turaǵyna jetkizilipti.
«Jedel aldyn alý sharasy kezinde 115 mektep avtobýsynyń tehnıkalyq jaǵdaıy men talapqa saı jabdyqtalýy tekserýden ótti. ShQO Jolaýshylar kóligi jáne avtomobıl joldary basqarmasyna bilim berý nysandarynyń jol ınfraqurylymyn jaqsartý boıynsha qosymsha usynystar jiberildi» - dep habarlady oblystyq Polıtsııa departamentiniń baspasóz qyzmeti.
Budan bólek, polıtseıler jol qozǵalysy erejelerin buzǵan birqatar avtobýs júrgizýshilerin anyqtaǵan. Naqty aıtsaq, memlekettik nemese mindetti tehnıkalyq baıqaýdan ótpegen 16 qoǵamdyq kólik marshrýtqa shyǵyp ketse, demalys rejımin buzyp rólge otyrǵan 14 júrgizýshi tirkelgen.
«Jyldamdyqty asyrǵany úshin 17 adam, kólik júrgizý kezinde telefonmen sóıleskeni úshin 102 adam ákimshilik jaýapkershilikke tartyldy» dep málimdedi vedomstvo ókilderi.
