«Avtobýs» jedel aldyn alý is-sharasynyń 1-shi kúninde jol qozǵalysy erejesi 242 ret buzylǵan
ASTANA. Qańtardyń 6-sy. QazAqparat /Marlan Jıembaı/ - Keshe elordada bastalǵan «Avtobýs» jedel aldyn alý is-sharasy kezinde avtobýs júrgizýshileri jol qozǵalysy erejesin 242 ret buzǵan.
Bul týraly búgin Astana qalalyq ІІD-inde ótken aptalyq brıfıngte Jol polıtsııasy basqarmasy tehnıkalyq qadaǵalaý bóliminiń bastyǵy Saǵadat Qalıasqarov málim etti.
Onyń aıtýynsha, is-sharanyń alǵashqy kúninde-aq qoǵamdyq kólik júrgizýshileriniń jol qozǵalysy erejelerin óreskel buzýyna qatysty 242 fakt anyqtalǵan. Atap aıtqanda, qoǵamdyq kólikti zańsyz jabdyqtaýǵa - 3, memlekettik tehnıkalyq baqylaýdan ótpeı jolaýshylar kóligin basqarýǵa - 3, toqtaý, turý, jolaýshylar tasymaldaý erejelerin buzýǵa - 8, jol qıylysy erejelerin buzýǵa - 3, qaýipsizdik belbeýin paıdalanýǵa - 20, kólik quralyn júrgizip kele jatyp uıaly telefondy paıdalanýǵa - 29, jol belgilerine nazar aýdarmaýǵa - 49, jol qozǵalysy erejesiniń basqa da talaptaryn buzýǵa qatysty 50 is anyqtalǵan. Sonymen qatar tehnıkalyq aqaýy bar qoǵamdyq kólikti jelige jibergeni úshin eki laýazymdy tulǵa ákimshilik jazaǵa tartylǵan.
«Tehnıkalyq aqaýy bar jáne qaıta jabdyqtalǵan 21 avtobýsty memlekettik tirkeý nómirin alý nemese ýaqytsha turaqtarǵa qoıý arqyly paıdalanýǵa shekteý qoıdyq», deıdi S.Qalıasqarov.
Qalalyq ІІD-niń málimetteri boıynsha, elordada 11 kásiporyn 58 qoǵamdyq baǵyt boıynsha qyzmet kórsetedi. Kún saıyn jelige 700 avtobýs shyǵady.
