Avtobýs túsip ketken shuńqyrdan 5 myń tekshe metr topyraq syrtqa shyǵaryldy

Pavlodar oblysy Baıanaýyl aýdany «Maıqaıyńaltyn» AQ ken ornynda oıyqqa qulap, sol kúıi iz-túzsiz ketkenderdi izdeý jumysy úshinshi kún jalǵasyp jatyr, dep habarlaıdy Kazinform.

Pavlodar oblysynyń ákimi Asaıyn Baıhanovtyń aıtýynsha, bul jumysqa barlyǵy 134 adam, 37 tehnıka, 3 kınologııa toby jáne 2 dron jumyldyrylǵan. 

«Biz „Maıqaıyń-altyn“ AQ taý-ken aýdanyndaǵy opyrylǵan jerde izdestirý jumystaryn jalǵastyryp jatyrmyz. Keshe jedel shtab mamandandyrylǵan tehnıkany opyrylǵan jerge túsirý úshin shamamen 120-130 metr tereńdikke transheıa qazý týraly sheshim qabyldady», — deıdi ákim. 

Onyń aıtýynsha, keshe opyrylǵan jerdiń túbine tehnıka túsirý úshin ótkel daıyndaý bastaldy.

Bul jumysqa 3 ekskavator, 2 tıegish, 2 býldozer jumyldyryldy.

Jumys táýlik boıy úzdiksiz júrip jatyr.

«5 myń tekshe metrge jýyq topyraq pen taý jynystary qazylyp, shyǵaryldy», — dep habarlady Asaıyn Baıhanov.  

Eske sala keteıik, 4 qańtarda «Maıqaıyńaltyn» ken ornynda úlken oıyq mańynda topyraq opyrylyp, 4 adam mingen avtobýs jerdiń astyna túsip ketken bolatyn.

Keıin oqıǵa ornynan eki adamnyń denesi tabyldy.

Keshkisin tabylǵandardyń kim ekeni belgili boldy.

Oqıǵa ornynda ıisshil ıtter jumys istep jatyr. Opyrylǵan jerde áli de topyraq syrǵyp túsip jatyr, opyrylý shekarasy turaqty emes.

Baıanaýylda ken ornynda kóz jumǵan jáne iz-túzsiz ketkenderdiń otbasyna 4,5 mln teńgeden beriledi.

Al qaza tapqandardy jerleý rásimine 2 mln teńgeden bólindi.

Maıqaıyńdaǵy altyn kenishi týraly ne bilemiz?

Altyn kenishindegi qaıǵyly jaǵdaıǵa baılanysty polıtsııa sotqa deıingi tergeýdi bastady.