«Avtobýs» profılaktıkalyq sharasynyń 4 kúninde 200 zań buzýshylyq anyqtaldy
ALMATY. QazAqparat- Almatyda «Avtobýs» jedel-aldyn alý is-sharasynyń tórt kúninde 200 zań buzýshylyq anyqtaldy, dep habarlaıdy QazAqparat tilshisi.
Esterińizge sala keteıik, megapolıste 4 qazannan bastap patrýldik ekıpajdar men polıtsııa qyzmetkerleri jolaýshylar kólikterin tekserip jatyr.
Atalǵan is-sharanyń maqsaty – kólik joldarynda jolaýshylar men júkterdi tasymaldaýmen aınalysatyn kólik júrgizýshileri arasynda tártipti arttyrý.
«Ókinishke oraı, is-shara kúnderi kórsetkishter tómendemeı tur. Polıtsııa qyzmetkerleri kún saıyn ár túrli dárejedegi buzýshylyqtardy anyqtap jatyr. Bul shara birinshi kezekte jolaýshylardy tasymaldaıtyn qoǵamdyq kólik júrgizýshileriniń jol qozǵalysy erejelerin buzýyn anyqtaýǵa jáne jolyn kesýge, sondaı-aq avtobýstardyń tehnıkalyq jaǵdaıyn tekserýge baǵyttalǵan. Júrgizýshilerdiń kóliktik tártibin jaqsartý, tehnıkalyq aqaýy bar nemese qaıta jabdyqtalǵan jolaýshylar kóliginiń faktilerin anyqtaý jáne zańsyz jolaýshylar tasymalyn toqtatý», - dedi Almaty qalalyq PD jergilikti polıtsııa qyzmeti basqarmasynyń bastyǵy Manap Sattarov.
Onyń aıtýynsha, tórt kún ishinde 200 ákimshilik quqyq buzýshylyq anyqtaldy.
«91 júrgizýshi QR ÁQbK-niń 595 baby (manevr jasaý erejelerin buzý), 41-i kólik júrgizý kezinde telefon qoldanǵan, QR ÁQbK-niń 591 babyna sáıkes erejelerdi buzdy. Ruqsat etilmegen 7 qoǵamdyq kólik pen taksı aıaldamasy joıyldy.11 qoǵamdyq kóliktiń memlekettik tirkeý nómirlik belgileri alynyp tastaldy»,-deıdi ol.
Aıta keteıik, is-shara 2021 jyldyń 13 qazanynda aıaqtalady.
