Avtobýs órtinen qaza tapqandardyń otbasyna kómek kórsetiledi - Ózbekstan TJM
ASTANA. QazAqparat - Aqtóbe oblysynda órtengen avtobýsta qaza tapqan Ózbekstan azamattarynyń denesi otanyna jetkiziledi, dep habarlaıdy «QazAqparat» HAA tilshisi Ózbekstan TJM baspasóz qyzmetine silteme jasap.
«Úkimet komıssııasyna Qazaqstan ókilderimen birlese otyryp, apattyń týyndaý sebepterin aıqyndaý, el azamattarynyń tulǵasyn taný boıynsha sharalardy júrgizý mindetteri júktelgen. Sondaı-aq komıssııaǵa qaza tapqandardyń denesi men zardap shekkenderdi Otanǵa jetkizýdi, olardyń otbasylaryna qajetti kómek kórsetýdi uıymdastyrý tapsyryldy», - delingen habarlamada.
Eske sala ketsek, 2018 jylǵy 18 qańtarda Ózbekstan Respýblıkasynyń Prezıdenti Shavkat Mırzıeevtiń tapsyrmasymen qurylǵan Premer-mınıstr basshylyq etetin arnaıy úkimet komıssııasy mingen ushaq Tashkentten Aqtóbege jol tartty.
Onyń quramynda Syrtqy ister mınıstrligi, Tótenshe jaǵdaılar mınıstrligi, Іshki ister mınıstrligi, Densaýlyq saqtaý mınıstrligi jáne basqa vedomstvolardyń ókilderi bar.
Eske salaıyq, tótenshe jaǵdaı Aqtóbeden 320 shaqyrym qashyqtyqta Qalybaı kentinen 10 shaqyrym jerde «Samara-Shymkent» tasjolynda bolǵan.
Jedel shtabta belgili bolǵandaı, avtobýs jolaýshylary Ózbekstannan Reseıge kúnkóris qamymen bara jatqan. Onda Ózbekstannyń 54 azamaty men 3 qazaqstandyq bolǵan. Avtobýsta shyqqan órt saldarynan 52 ózbekstandyq qaza tapty. Tiri qalǵandardyń arasynda 3 qazaqstandyq jáne 2 ózbekstandyq bar. Olardy jeńil deńgeıde kúıik shalǵan. Oqıǵanyń mán-jaıy tergeý amaldary barysynda anyqtalmaq. Osy oqıǵaǵa baılanysty arnaýly Úkimettik komıssııa quryldy.
