Avtobýs órtinen aman qalǵandardy aýrýhanadan shyǵarý úshin quqyq qorǵaýshylardyń ruqsaty kerek
AQTÓBE. QazAqparat - Aqtóbede avtobýs órtinen aman qalǵan 5 adam áli aýrýhanada jatyr. Dárigerler olardy aýrýhanadan shyǵarýǵa daıyn, dep habarlaıdy QazAqparat tilshisi.
Samara-Shymkent tasjolynda avtobýs órtenip, 52 adam qaza bolǵan bolatyn. Sol kezde 5 adamdy kúıik shalyp, Aqtóbe oblystyq jedel járdem aýrýhanasyna jetkizildi. Olardyń úsheýi Qazaqstan, ekeýi Ózbekstan azamaty. Qazir báriniń densaýlyǵy jaqsy, dárigerler olardy aýrýhanadan shyǵarýǵa daıyn.
«Avtobýs órtinen soń jedel járdem aýrýhanasyna 5 adam jetkizilip, em aldy. Olardyń jaǵdaıy turaqty, qanaǵattanarlyq. Qoldary kúıgen adamnyń jarasy jazylyp kele jatyr. Shynyn aıtqanda, bári statsıonarlyq em alyp boldy. Shyǵarýǵa daıynbyz. Tergeý jumystary júrip jatqan soń aman qalǵan adamdardyń bári aýrýhanada bolady. Taıaýda Shymkentten týǵan-týystary keldi. Biraq kezdesýge bolmaıdy, olardy ishki ister organdarynyń qyzmetkerleri kúzetip otyr», - dedi Aqtóbe oblystyq jedel járdem aýrýhanasynyń bas dárigeri Raqymjan Arystan.
Aıta keterligi, Avtobýs órtinen aman qalǵandar endi quqyq qorǵaýshylardyń ruqsatymen ǵana shyǵarylady.
