Avtobýs órtine kim kináli ekenin tek sot sheshedi - sottalýshy
AQTÓBE. QazAqparat - Aqtóbede avtobýs órtine qatysty sot otyrysynda sottalýshy Maqsat Pernebekov uıyqtap jatqanyn, esin aýrýhanada jıǵanyn aıtyp berdi. Júrgizýshi ózin kináli sanamaıdy, dep habarlaıdy QazAqparat tilshisi.
Aqtóbe oblystyq qylmystyq ister jónindegi mamandandyrylǵan aýdanaralyq sotynda avtobýs órtine qatysty sot otyrysy jalǵasyp jatyr. Búgin sottalýshy Maqsat Pernebekov Túrkistan oblysy, Saryaǵash aýdandyq sotynda otyrǵan jábirlenýshilerdiń suraǵyna jaýap berdi. Ol avtobýsta órt shyqqan kezde uıyqtap jatqanyn, esin aýrýhanada jıǵanyn aıtyp berdi.
«Avtobýs toqtaǵan kezde eski dońǵalaqty shyǵaryp, 40-50 metr jerge aparyp qoıdym. Tońǵan adam bolsa jaǵyp, jylynýǵa bolatynyn eskerttim. Ózim avtobýsqa kirip, uıyqtap qaldym. Nurjan Qyrǵyzbaevtyń benzın úshin aqsha suraǵanyn bilemin. Oǵan aqsha berip, ári qaraı uıyqtaı berdim. «Paıalnıkti» kim jaqqanyn, ony salonǵa kim ákelgenin bilmeımin. Ózim «órt» degen daýysty estip, qashyp shyqtym. Kúıik boldy, esimdi bilmedim. Kózimdi ashqanda oblystyq aýrýhanada jattym. Janymdaǵy adamdardan qalaı bolǵanyn suraǵanymda, ózbekstandyq Ahror Isaqovtyń benzın toly qutyny teýip, janyp ketkenin bildim. Basqa eshteńe aıta almaımyn»,- dedi sottalýshy Maqsat Pernebekov.
Sottalýshynyń aıtýynsha, avtobýs ishinde 3 órt sóndirý quraly jáne terezelerdi syndyrýǵa arnalǵan 4 balǵa bolǵan. Biraq is júzinde olardyń eshqaısysy da paıdalanylmady.
«Men 9 jyldan beri júrgizýshi bolyp jumys isteımin. Janar-jaǵarmaı qatyp, jolda turyp qalǵan kezimiz bolǵan emes. Men avtobýsty jalǵa alyp jumys istemeımin, qarapaıym júrgizýshimin. Avtobýs ta jańa bolatyn. Kim kináli ekenin bilmeımin, bárin sot sheshedi. Biraq men jolaýshylardyń barlyǵyna jaýapty boldym»,- dedi sottalýshy M.Pernebekov.
Eske salsaq, buǵan deıin sottalýshy Barat Tańatov sot otyrysy kezinde avtobýstyń terezesin syndyryp, «sekirińder» dep aıqaılaǵanmen eshkim syrtqa shyqpaǵanyn aıtyp berdi. Ol da «paıalnıkti» kim jaqqanyn bilmeıdi.
