Avtobýs órti: Sýdıa jazany jeńildetetin mán-jaılardy atap berdi
AQTÓBE. QazAqparat - Aqtóbede avtobýs órtine qatysty qylmystyq iske baılanysty úkimi shyqty. Sýdıa jazany jeńildetetin mán-jaılardy atap ótti, dep habarlaıdy QazAqparat tilshisi.
Yrǵyz aýdandyq soty búgin sottalýshylar Nurjan Qyrǵyzbaev, Maqsat Pernebekov, Barat Tańatov, Bahadúr Perdebaev, Nurlybek Tilepbaevqa qatysty qylmystyq isti qarady. Buǵan deıin habarlaǵanymyzdaı, Nurjan Qyrǵyzbaev, Maqsat Pernebekov, Barat Tańatovty Qylmystyq kodekstiń 292, 345-baptarym boıynsha aıypty dep tanyp, 5 jyl bas bostandyǵynan aıyryldy. Al Nurlybek Tilepbaev pen Bahadúr Perdebaev 3 jyl 6 aıǵa bas bostandyǵynan aıyrylyp, sot zalynan qamaýǵa alyndy. Bári de jazasyn qonys kolonııasynda óteıdi.
Sýdıa Serik Mahambetov jazany jeńildetetin mán-jaılardy atap ótti.
«Sot sottalýshylar N.Tilepbaev, B.Perdebaev, N.Qyrǵyzbaev, M.Pernebekov jáne B.Tańatovqa jaza taǵaıyndaý kezinde olardyń buryn sottalmaǵanyn, asyraýynda kámeletke tolmaǵan balalary bar ekenin eskerdi. Sotta qylmystyq jaýapkershilikti, jazany aýyrlatatyn mán-jaılar anyqtalǵan joq. Degenmen qylmystyń qoǵamǵa qaýiptiligin, sıpatyn jáne saldaryn, 52 adamnyń qaıtys bolǵanyn jáne jábirlenýshilerdiń tolyq keshirmeýin eskerip, sot QR Qylmystyq kodekstiń 55-babynyń 2-bóligin basshylyqqa aldy jáne bas bostandyǵynan aıyrý jazasyn taǵaıyndady», - dedi oblystyq sottyń baspasóz qyzmeti.
Aıta keteıik, sottalýshylar birigip, 43 jábirlenýshiniń árqaısysyna 2 mıllıon teńge moraldyq shyǵyn tóleýi tıis. ıAǵnı, qylmystyq is boıynsha jaýap bergen árbir sottalýshy 17,2 mıllıon teńge azamattyq talap-aryzdy bir aıda qanaǵattandyrýy qajet. Jábirlenýshilerdiń keıbiri moraldyq shyǵynnan bas tartty. Olar sot sheshimimen kelispeı, apellıatsııalyq shaǵym túsiretinin jetkizdi. Sottalýshydar da sheshimmen kelispeı, qaıta shaǵym túsiretinin aıtty.
Sot úkimi zańdy kúshine engen joq.
Eske salsaq, bıyl 18 qańtar kúni Aqtóbe oblysyndaǵy «Samara-Shymkent» avtojolynda Ózbekstan azamattary mingen avtobýs órtenip, 52 adam ajal qushqan bolatyn.
