Avtobýs órti: Sottalýshy terezeni syndyryp, ishtegilerge sekirińder dep ótingen
AQTÓBE. QazAqparat - Aqtóbedegi avtobýs órtine qatysty sot otyrysy jalǵasyp jatyr. Sottalýshy Barat Tańatov terezelerdi syndyryp, ózbekstandyqtardyń sekirýin ótingenin aıtyp berdi, dep habarlaıdy QazAqparat tilshisi.
Aqtóbe oblystyq qylmystyq ister jónindegi mamandandyrylǵan aýdanaralyq sotynda avtobýs órtine qatysty sottalýshylar jaýap berip jatyr. Sottalýshy Barat Tańatov órt kezindegi áreketin túgel aıtyp berdi.
«Men 14 qańtar kúni Maqsat Pernebekovti kórip, onyń Reseıge baratynyn bildim. Ol 16 qańtar kúni keshkilik avtobýstyń buzylyp turǵanyn, jóndeýge kómektesýin surady. Bardym, biraq kómektese almadym. Al tańda Pernebekov taǵy habarlasyp, reıske shyǵatynyn aıtty. Men avtovokzaldan emes, joldan minip aldym. Maqsatym - Qazan qalasyna jetip, ári qaraı kólik satyp alý úshin Nıjnıı Novgorodqa barý edi. Qaltamda aqsham da bolǵan. Keıin Pernebekov menen kólik aıdaýǵa kómektesýimdi surady ári aqysyn tóleýge ýáde etti. Men kelisip, Shymkentten Jańaqorǵanǵa deıin kólik júrgizdim. Al Aralǵa kelip, demalys ornyna toqtaǵan kezde 2 ózbek azamaty tóbelesip jatty. Keıin olardyń ózbekstandyqtardy basqaryp kele jatqan eki jaýapty adam ekenin bildim. Jolda polıtsııa teksergen kezde de kólik rólinde men otyrǵan edim. Polıtsııaǵa qujattardy kórsettim. Qujattar arasynda jolaýshylar tizimi bolǵanymen, qansha adam ekenin naqty ańǵarmadym», - dedi sotta sóz alǵan Barat Tańatov.
Avtobýs toqtaǵan kezde aıyptalýshy uıyqtap jatqan eken. Tańǵy saǵat 7:00-7:30 shamasynda ony Maqsat Pernebekov oıatqan.
«Pernebekov tońyp qalǵandar jylyný úshin dalaǵa kólik dońǵalaǵyn jaǵýǵa bolatynyn aıtty. Biraq eshkim qajet etpedi. Men ishke kirgende olardyń jylyný úshin «paıalnık» paıdalanyp otyrǵanyn kórdim. Nurjan Qyrǵyzbaev otyrdy, men janynda turdym. Keıin qarsy betke avtobýs kelip toqtady, men baryp, ishine kirip sóılesip turǵanda Nurjan Qyrǵyzbaev shyqty. Ol 5-6 metr uzaǵanda balaǵy janǵan taǵy bir adam shyqty. Sodan basqa avtobýstyń ishindegi órt sóndirý quralyn alyp, terezelerge laqtyrdym, sekirińder dep aıttym. Aıqaılap jatty, biraq eshkim sekirmedi»,- dedi sottalýshy Barat Tańatov.
Ol qolyna órt sóndirý quralyn alyp, iske qospaq bolady. Biraq qural isten shyqqan soń ony terezege laqtyryp, ishindegi adamdardan sekirýin ótingen.
«Janymyzdaǵy avtobýstan eki júrgizýshi shyqty, men de qaradym. Órt sóndirý quraly iske qosylmady. Terezelerdi aınala syndyra bastadym. Іshinde aıqaı-shý boldy. Nurjan Qyrǵyzbaev ta syndyrdy. «Sekirińder» dep aıqaılaǵanmen eshkim sekirmedi. Aldyńǵy esikten shyǵý múmkin emes edi. Sebebi, jel kúsheıip, órt órshı tústi. Sonda tek Maqsat Pernebekov pen taǵy bir ózbek azamaty shyqty. Qara tútin boldy. Al aman qalǵan eki ózbek azamaty shyqqan boıda tyǵylyp, qarsy bette toqtap turǵan avtobýstyń ishinde tyǵylyp otyrdy. Avtobýs janǵan kezde ózge avtobýstaǵy 20-dan astam adam da shyǵyp, kómektespedi»,- dedi B.Tańatov.
Sottalýshy órt aldyńǵy esik jaqtan shyqqan soń ishke kirip, kómek kórsetý múmkin bolmaǵanyn, 10-15 mınýtta avtobýs túgel janyp ketkenin aıtyp berdi.
Eske salsaq, avtobýs órtine qatysty «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzý», «Órt qaýipsizdigi talaptaryn buzý», «Mindetterin adal atqarmaý», «Kólik quraldaryn sapasyz jóndeý nemese olardy tehnıkalyq aqaýlarymen paıdalanýǵa shyǵarý» baptarymen úsh júrgizýshi jáne mehanık, quryltaıshy aıyptalyp jatyr. Olar - Nurjan Qyrǵyzbaev, Maqsat Pernebekov, Barat Tańatov, Nurlybek Tilepbaev, Bahadúr Perdebaevtar.
