Avtobýs órti: Sot otyrysynda kýágerlerdiń tergeý kezindegi jaýaptary oqyldy
AQTÓBE. QazAqparat - Aqtóbe avtobýs órtine qatysty sot otyrysy jalǵasyp jatyr. Búgin kýágerlerdiń jaýaby oqyldy, dep habarlaıdy QazAqparat tilshisi.
Aqtóbe oblystyq qylmystyq ister jónindegi mamandandyrylǵan aýdanaralyq sotynda Samara-Shymkent tasjolynda órtenip ketken avtobýsqa qatysty sot otyrysy ótti. Oqıǵa bolǵan kúni órtengen avtobýs janyna toqtaǵan ózge avtobýstyń júrgizýshileri sot otyrysyna qatyspaı, olardyń tergeý kezinde aıtqan jaýaptary oqyldy. Jaýap alý kezinde Nurbaqyt Shaımerdenov avtobýs órtengen kezde ishindegi adamdar aıqaılaǵanyn, olardyń jantalasyp jatqanyn estigenimen, eshkim tereze arqyly sekirmegenin aıtyp bergen.
«Reseıdiń Krasnodar qalasynan OQO, Saryaǵash aýdanyń Jibek joly keden bekenine qaraı jolǵa shyqtym. Avtobýsta 32 jolaýshy boldy. 18 qańtar kúni saǵat 10:00 shamasynda Yrǵyz mańynda avtobýstyń toqtap turǵanyn kórdik. Kólikti júrgizip kele jatqan Baqbergen Ábilov 15-20 metr jerge toqtady. Avtobýstan bir jigit shyqty. Onyń artynan eki adam tústi. Bireýi avtobýsqa kirip, túnde janar-jaǵarmaıdyń qatyp qalǵanyn aıtyp berdi. Dál sol ýaqytta avtobýstan shalbary órtengen jigit sekirdi. Keıin basy janǵan bir adam tústi. Biz órt sóndirý quralyn alǵanymyzben iske qosylmady. Adamdar aıqaılap jatqan soń terezege laqtyrdym. Qara tútin shyqty, daýystar estildi, ishtegi adamdar dúrligip jatty. Bári qolyna ilikken zatty alyp, terezelerdi syndyrdy. Arada 15 mınýt ótkende avtobýs ishindegi dybys sap tyıyldy. Janyp ketken kezde júk kólikteri toqtady. Arada 40 mınýt ótkende tótenshe jaǵdaı qyzmeti keldi»,- dep jaýap bergen kýáger Nurbaqyt Shaımerdenov.
Sot otyrysy kezinde dál osy ádispen kýáger Baqbergen Ábilovtyń jaýaby oqyldy.
«Avtobýstyń ishinde otyrǵan jolaýshylar shyǵyp, órtenip jatqan adamdardy qutqarmaqqa júgirdi. Janyp túsken eki adamǵa jaqyndaǵan kezde aldyńǵy esikten órt shyqty. Jolaýshylar aıqaılap jatty. Kirip kómek kórsetý múmkin bolmady. Іshi qara tútinge tolyp, adamdar janyp jatty. Keıin 10-15 mınýt kómektesýge kúsh salyp, adamdardyń daýysy shyqpaı qalǵan soń janar-jaǵarmaı bagi atylyp keter degen qaýippen keıin sheginýge týra keldi»,- dep jaýap berdi kýáger Baqbergen Ábilov. Kýáger óz telefonymen polıtsııaǵa habar berip, arada 40 mınýt ótkende tótenshe jaǵdaılar qyzmeti kelgenin óz jaýabynda aıtyp bergen.
Aıta keteıik, sot otyrysyna tiri qalǵan eki ózbek azamaty kelmedi. Olardyń jaýaby dál osy tásilmen sot otyrysy kezinde oqyldy. Búgin qaza tapqan ózbek azamattarynyń týystary da sotqa qatyspady. Olar óz talap aryzdaryn jazyp, qorǵaýshylaryna qaldyryp ketken. Qazir ózbek tilinde jazylǵan talap aryz aýdarylyp jatyr. Aldaǵy sot otyrysynda jábirlenýshilerdiń aıyptalýshylarǵa qoıar talaby anyqtalady.
Eske salsaq, avtobýs órtine qatysty «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzý», «Órt qaýipsizdigi talaptaryn buzý», «Mindetterin adal atqarmaý», «Kólik quraldaryn sapasyz jóndeý nemese olardy tehnıkalyq aqaýlarymen paıdalanýǵa shyǵarý» baptarymen úsh júrgizýshi jáne mehanık, quryltaıshy aıyptalyp jatyr. Olar - Nurjan Qyrǵyzbaev, Maqsat Pernebekov, Barat Tańatov, Nurlybek Tilepbaev, Bahadúr Perdebaevtar.
