Avtobýs órti: Aqtóbelikter ózbek azamattarynyń rýhyna quran baǵyshtady
AQTÓBE. QazAqparat - Aqtóbe oblysy, Yrǵyz aýdany, Qalybaı aýylynyń kásipkeri Nurabek Saımov búgin qaza bolǵan ózbek azamattarynyń rýhyna Quran baǵyshtady, dep habarlaıdy QazAqparat tilshisi.
Aqtóbe oblysy, Yrǵyz aýdany, Qalybaı aýyly mańynda Ózbekstan azamattary mingen avtobýs janyp ketip, 52 adam qaza tapqan bolatyn. Qazirgi kezde úsh júrgizýshi qamaýǵa alynyp, tergeý jumystary júrip jatyr.
Samara-Shymkent tasjolyndaǵy qaıǵyly oqıǵadan soń taǵy birneshe avtobýs jolda toqtap qaldy. Osy kezde qazaqstandyqtar qaza bolǵan adamdardyń rýhyna Quran baǵyshtaý qajet ekenin aıtty. Al búgin Yrǵyz aýdanynyń kásipkeri Nurabek Saımov qoı soıyp, as berdi.
«Búgin ózbek baýyrlarymyzdyń qaza bolǵanyna 40 kún boldy. Jol boıyndaǵy oqıǵaǵa baılanysty quran baǵyshtap, mal soıýdy jón sanadyq. Bul dastarhanǵa jolaýshylar shaqyryldy»,- dedi aýyl kásipkeri.
Mal sharýashylyǵyn damytyp otyrǵan Nurabek Saımov qaıyrymdylyq sharalaryna jıi qatysady. Áleýmettik jaǵdaıy tómen otbasylarǵa kómek kórsetýge daıyn turatyn kásipker bul joly da aýdan ákimi Mádı Eleýsizovtyń usynysyn qoldaǵan.
«Ákem maldy aýylda bolǵan soń onymen baılanys ornatý qıyn. Taıaýda qalaǵa kelip, aýdan ákimi usynys bergen soń mal soıyp, dastarqan jaıýdy óz mindetine alǵanyn jetkizdi. Ózbekstan azamattaryna quran baǵyshtap, jolaýshylardy da shaqyrdy. Bul ata-babamyzdan kele jatqan dástúr. Jolda mundaı qaıǵyly jaǵdaı qaıtalanbasyn degen tilekpen aýyldyń bári ıgi iske jumyldy»,- dedi Nurabek Saımovtyń qyzy Aıman Janǵasova.
