Avtobýs órtengende salonda jolaýshylar bolmaǵan - Almatyelektrotrans
ALMATY. QazAqparat - «Almatyelektrotrans» kompanııasy órtengen atvobýsqa qatysty túsinikteme berdi, dep habarlaıdy QazAqparat tilshisi.
Tasymaldaýshy kompanııanyń habarlaýynsha, avtobýs parkten shyqqanda aqaýsyz bolǵan.
«Búgin tańerteń №137 marshrýt avtobýsy parkten shyqqanda, eshqandaı tehnıkalyq aqaý baıqalmady. Jolda jolaýshylardy salonǵa kirgizbeı turǵanda kóliktiń artqy dóńgelegi tutana bastaǵan. Júrgizýshi ınstrýktsııaǵa sáıkes 101 nómirine habarlasyp, órt sóndirýshilerdi shaqyrǵan. Sosyn órt sóndirýshiler kelgenshe jolaýshylardy alysqa baǵyttap, órt sóndirý ballonynyń arqasynda órtti ózi sóndirgen. Kólik órtengende salonda jolaýshylar bolmaǵan», - dedi tasymaldaýshy kompanııanyń baspasóz qyzmetinen.
Ázirge órttiń shyǵý sebepteri belgisiz. Qazir sony anyqtaýǵa arnaıy tekserý taǵaıyndaldy.
Aıta ketý kerek, tótenshe jaǵdaı búgin tańerteń saǵat 9.21-de bolǵan edi. Shuǵyla shaǵyn aýdanynda Nurly jáne Sábdenov kósheleriniń qıylysynda №137 baǵdardaǵy avtobýstyń artqy dóńgelegi jana bastaǵan.
