Avtobýs qurdymǵa qulaǵan Maıqaıyń kentindegi kásiporyndar bıýdjetke qandaı paıda ákelip otyr
PAVLODAR. KAZINFORM — Maıqaıyń — ereksheligi basym eldi meken. Erekshe deıtini sol, 9 myńnan asa halyqtyń berekesine aınalǵan álemge áıgili altyn kenishi osynda oryn tepken. Bıyl Maıqaıyńnyń, ondaǵy taý-ken óndirisiniń alǵash óz aldyna qurylǵanyna 92 jyl tolady.
Maıqaıyń óz aldyna eldi meken bolǵaly onyń ekonomıkasy jerasty baılyǵyna táýeldi. Altyn kenishi jergilikti halyqty asyrap otyr.
«Maıqaıyńaltyn» aktsıonerlik qoǵamy Ertistiń Pavlodar óńirindegi eń alǵash qurylǵan taý-ken óndirisi ekenin de atap ótken abzal. Ondaǵy kenishke tuńǵysh ekskavator 1940 jyly túsirilgen eken. Ol býmen jumys isteıtin edi. Búginde kásiporynǵa eki kenish jáne ken-baıytý fabrıkasy qaraıdy. Jergilikti halyqtyń deni búginde altyn óndirisinde eńbek etedi.
— Maıqaıyń kentiniń ákimshilik aýmaǵyna Maıkóbe, Sulýjon, Úshqulyn, Shóptikól aýyldary kiredi. Búginde kent pen oǵan qarasty aýyldarda «Maıqaıyńaltyn» AQ-nan bólek, paıdaly qazbalar óndirýmen 5 birdeı kásiporyn aınalysady. Olar — kómir óndiretin «Maıkýben Vest» aktsıonerlik qoǵamy, «Qazaqstan alıýmınııi» AQ fılıaly — «Keregetas» kenishi, «Maıqaıyń aqtas óndirý zaýyty» JShS, «Pnevmosoqqysh burǵylaý» ǵylymı óndiristik kásiporny» JShS, «IBM Gold» JShS, - dep atap kórsetti Baıanaýyl aýdanynyń ákimi Ardaq Kisentaev Kazinform agenttiginiń tilshisine bergen jaýabynda.
Byltyr «Maıqaıyńaltyn» AQ aýdandyq bıýdjetke 840 mln 714 myń teńge salyq tólegen. Eń úlken salyq tóleýshi — «Maıkýben Vest» AQ, ótken jyly bul óndiris orny jergilikti qazynaǵa 1 mlrd 681,3 mln teńge qarjy quıǵan.
Sonymen qatar, jerdi paıdalanǵany úshin 2023 jyly kelesideı qosymsha salyq tólengen:
— «Maıqaıyńaltyn» AQ — 6 mln 739 myń teńge;
— «Maıkýben Vest» AQ — 46 mln 314 myń teńge;
— «Keregetas» kenishi — 8 mln 329 myń teńge;
— «Pnevmosoqqysh burǵylaý» JShS — 1 mln 531 myń teńge;
— «Gravelıt» JShS — 192 myń teńge.
Sońǵy atalǵan eki kásiporyn jergilikti kásipker Tımýr Qabdýlovqa tıesili. Ol — «Maıqaıyńaltyn» AQ bas dırektorynyń keńesshisi Orynjan Qabdýlovtyń uly.
