Avtobýs apatynan jyl saıyn 50 adam kóz jumady - ІІM

NUR-SULTAN. QazAqparat - QR ІІM Ákimshilik polıtsııa komıtetiniń tóraǵasy Maqsat Baıbolov jolaýshylar tasymalyndaǵy qaýipsizdik máseleleri jóninde aıtyp berdi, dep habarlaıdy QazAqparat tilshisi.

Onyń aıtýynsha, jolaýshylar tasymalynyń qaýipsizdigi máselesi ІІM-niń erekshe baqylaýynda.

«Qazaqstanda jyl saıyn avtobýs júrgizýshileriniń kinásinen 500-ge jýyq jol-kólik oqıǵasy bolady. Saldarynan 50-ge jýyq adam mert bolyp, 700-den astam adam jaraqattanady. Bıyl mundaı apat kórsetkishteri edáýir azaıdy. Degenmen, jolaýshylar kóliginiń apatqa ushyraýy árdaıym rezonansqa ıe», - dedi Maqsat Baıbolov.

Bul apattardyń sebebi kólik júrgizýshileriniń tómen jaýapkershiligimen, apattyń aldyn alý jumystarynyń bolmaýymen baılanysty. Jolaýshylar kóligin jolǵa shyǵarýǵa jaýapty laýazymdy tulǵalar baqylaýdy kúsheıtýi qajet.

«2018 jyly polıtsııa men kóliktik baqylaý ınspektsııasy birigip, jolaýshylar kóliginiń júrgizýshileri jol bergen 37 myń zańbuzýshylyqty anyqtady, al bıyl 7 myń zańbuzýshylyq anyqtaldy. Mundaı reıdterdi júrgize berý jolaýshylar tasymalyn qaýipsiz ete almaıdy. Bul salada zańnamalyq sıpattaǵy júıeli sharalardy qabyldaý qajet», - dedi Maqsat Baıbolov.

Sonymen birge, ІІM ókili kóptegen adamdardyń jolaýshylardy zańsyz tasymaldaıtynyn atap ótti. Olardyń kólikteri eski jáne jaǵdaıy máz emes.

«Zańsyz tasymaldaıtyn avtobýstardyń kópshiliginde tehnıkalyq aqaýlar bar, olardyń konstrýktsııasyn ózgertken, tipti qoldan jasaǵan. Kólik júrgizýshileri medıtsınalyq tekserýden ótpeıdi, eńbek jáne demalys rejımin saqtamaıdy. Osyndaı kemshilikterdi jyl saıyn anyqtaımyz. Saldarynan jol apaty bolyp, jolaýshylar zardap shegedi», - dedi ol.

Komıtet ókili jolaýshylardy avtobýspen tasmaldaý qaýipsizdigin arttyrý úshin jol kartasy jobasy ázirlenetinin jetkizdi.