Avtobýs apatyna túsken oqýshylar Almaty aýrýhanasyna aýystyryldy
TALDYQORǴAN.QazAqparat – Almaty oblysynda kólik apatyna túsken 8 oqýshy men bir muǵalim Almaty qalasynyń aýrýhanasyna aýystyryldy. Zardap shekkenderdiń barlyǵy Almaty qalasyndaǵy №134 mektep-gımnazııasynda oqıdy, dep habarlaıdy QazAqparat tilshisi.
«Búgin bizdiń aýrýhanaǵa 9 adam tústi. Onyń 8-i - bala. Olardyń jaǵdaıy qanaǵattanarlyq jáne ortasha deńgeıde. Barlyǵyna medıtsınalyq tekserý júrgizildi, dıagnoz qoıyldy. Almaty qalalyq densaýlyq saqtaý basqarmasymen aradaǵy kelisimshart boıynsha barlyǵy Almatydaǵy №1 klınıkalyq aýrýhanaǵa jiberildi», - dedi Jambyl aýdandyq ortalyq aýrýhanasynyń dırektory Damır Sýraýjanov.
Aıta keteıik, buǵan deıin Almaty oblysynda oqýshylar mingen avtobýs jol apatyna ushyraǵanyn habarlaǵan bolatynbyz. Oqıǵa Jambyl aýdanyndaǵy Qopa stansasyna jaqyn mańda bolǵan. Aldyn ala boljam boıynsha, avtobýs aldynan shyqqan jylqyny aınalyp ótpek bolyp, kólik apatyna ushyraǵan. Al ІІM baspasóz qyzmetiniń málimetinshe, avtobýsta 47 adam bolǵan. Olardyń barlyǵy Tańbaly tasty kórýge jolǵa shyqqan.
