Avtobýs apatqa ushyrap, 22 jolaýshy tirideı janyp ketti
ASTANA.QazAqparat - Úndistannyń soltústiginde avtobýstyń júk mashınasyna soǵylýy saldarynan 22 jolaýshy tirideı janyp ketti, dep habarlaıdy NDTV telearnasy.
Oqıǵa dúısenbi kúnge qaraǵan túni Ýttar-Pradesh shtatyndaǵy Barelı qalasynda bolǵan. Júk mashınasyna soǵylǵannan keıin avtobýstyń janarmaı bagy jarylǵan. Kóptegen jolaýshylary uıqyǵa ketken avtobýs áp-sátte otqa orandy.
«05.45 shamasynda bizge avtobýs soǵylǵan jerden 22 adam jetkizildi. Adamdardyń denesi adam tanymastaı kúıip ketken», - deıdi Barelı aýrýhanasynyń qyzmetkeri Shaılesh Randjan.
JKA sebebi anyqtalyp jatyr. Keı málimetterge súıensek, jol-kólik oqıǵasy avtobýstyń qarsy baǵytqa shyǵýynan bolǵan. Avtobýs Jańa-Delı qalasynan Gonda qalasyna bara jatqan.
