Avtobýs apatynan zardap shekken Alýanyń otbasyna ákimdik 4 bólmeli páter syılady

ASTANA. KAZINFORM — Memleket basshysynyń tapsyrmasyna sáıkes, Astana qalasynyń ákimdigi jeke demeýshimen birlesip, otbasyǵa elordadaǵy jańa turǵyn úı kesheninen tórt bólmeli páterdiń sertıfıkatyn tabystady. Bul týraly Astana qalasynyń ákimdigi málim etti. 

— Turǵyn úı kesheni bıyl qazan aıynda paıdalanýǵa beriledi. Budan bólek, qurylys kompanııasy páterdi jóndeý jáne jabdyqtaý jumysyna da kómek kórsetetin bolady. Osyǵan deıin zardap shekken otbasyǵa kórsetiletin ózge de qoldaý sharalary týraly habarlanǵan bolatyn, — delingen habarlamada.

Eske sala keteıik, buǵan deıin elordada qoǵamdyq kólik baǵanǵa soǵylyp, birneshe adam jaraqat alǵanyn jazǵan edik. Zardap shekkender aýrýhanaǵa jetkizilgen bolatyn. 

Artynsha bir jolaýshynyń aıaǵy ampýtatsııalanǵany habarlandy.

Keıin zardap shekken balanyń otbasyna 30 mln teńgedeı beriletini belgili boldy.

Al, búgin Astana qalasynyń ákimi Jeńis Qasymbek jol apatynan zardap shegip, qos aıaǵynan aıyrylǵan Alýanyń otbasyna páter beriletinin aıtty.