Avtobýs apatynan keıin balanyń aıaǵy nege ampýtatsııalandy – mınıstrlik túsinik berdi
ASTANA. KAZINFORM — QR Densaýlyq saqtaý vıtse-mınıstri Erjan Nurlybaev elordadaǵy avtobýs apatynan keıin dárigerler jolaýshynyń aıaǵyn ne sebepti kesýge májbúr bolǵanyn túsindirdi.
- Qoǵamda keıbir adamdardyń balanyń aıaǵyn saqtap qalýǵa qatysty medıtsına qyzmetkerlerine syn aıtyp jatqany aqylǵa qonymsyz. Jol-kólik apaty kezinde balanyń aıaǵyndaǵy tinniń barlyǵy ydyrap ketken. Sondyqtan aıaǵyn saqtap qalý múmkin emes edi, - dedi E. Nurlybaev Parlament Májilisinde tilshiler suraǵyna jaýap bere otyryp.
Osy oraıda ol dárigerler birinshi kezekte balanyń ómirin saqtap qalý úshin barynsha áreket etkenin aıtty.
- Dárigerler óz jumysyn óte jaqsy oryndady. Qazir balanyń tiri qalýy da medıtsına qyzmetkerleriniń eńbegi dep aıtýǵa bolady, - dedi vıtse-mınıstr.
Eske sala keteıik, buǵan deıin elordada qoǵamdyq kólik baǵanǵa soǵylyp, birneshe adam jaraqat alǵanyn jazǵan edik. Zardap shekkender aýrýhanaǵa jetkizilgen bolatyn.
Artynsha bir jolaýshynyń aıaǵy ampýtatsııalanǵany habarlandy.