«Avtobýs» aldyn-alý sharalary barysynda eki kúnniń ishinde 501 jol qozǵalysy erejelerin óreskel buzǵan kólik júrgizýshileri anyqtaldy

dep habarlaıdy QazAqparat qalalyq ІІD-niń jol polıtsııasy basqarmasy qyzmetiniń baspasóz qyzmetine silteme jasap.

Araq ishken jáne esirtkige elitken tórt avtobýs júrgizýshisi ustalǵan. "Qujattardy tekserý barysynda bir júrgizýshiniń júris-turysy kúdik keltirdi. Ol qatty ábirjip turdy. Biz ony medıtsınalyq tekserýge jiberdik. Dáriger-narkolog, ol esirtki qoldanyp kólik júrgizgen degen qorytyndy berdi", dedi jol polıtsııasy basqarmasy basshysynyń orynbasary, polıtsııa polkovnıgi Muqan Dosymbaev.

Ustalǵan júrgizýshiniń aıtýynsha, ol birneshe kún buryn dostarymen gashısh tartqan. Ol rólde bolǵan kezde avtobýs ishinde onshaqty jolaýshy bolǵan. Osy jaǵdaılarǵa oraı, mas qalpynda kólik júrgizýge ruqsat bergendigi úshin tórt laýazymdy tulǵa jaýapkershilikke tartylǵan.

Tekserý barysynda sonymen qatar, tehnıkalyq aqaýy bar avtobýs júrgizgen 126 júrgizýshi anyqtalǵan.

"Shara barysynda jol tártibin buzýshylarǵa qarsy arnaıy jumystar júrgizilýde. Barlyq avtoparkter tekserildi. Avtobýs jáne trolleıbýs parkteriniń ókilderimen túsindirý sharalary júrgizildi", dedi Muqan Dosymbaev.