Avtobýs aqysyn tóleýden qashatyn astanalyqtardyń úlesi qansha
NUR-SULTAN. QazAqparat – Elordada qoǵamdyq kólik aqysyn tólemeı júretin jolaýshylardyń úlesi belgili boldy, dep habarlaıdy QazAqparat tilshisi.
«Engizilip jatqan jańa júıe arqyly jolaýshy bir sátte jolaqysyn tóleı alsa, ekinshi jaǵynan qoǵamdyq kólik kartasyna birlik jiberý múmkindigi bar. Ózderińiz bilesizder, osyǵan deıin arnaıy qoǵamdyq kólik kartasy arqyly tóleý júıesi boldy. Oǵan birlik salý uzaqqa sozylatyn, ıaǵnı jolaýshy aqsha salady, biraq ol kartaǵa birden túspeıdi. Bul júıe jolaýshylar úshin yńǵaısyz boldy. Osy jáne ózge de máselelerdi eskere otyryp qoǵamdyq kólikte jolaqysyn tóleýdiń jańa júıesin engizip jatyrmyz», - dedi CTS (City Transportation Systems) JShS-niń basqarma tóraǵasy Bekmyrza Igenberdınov baspasóz máslıhatynda.
Onyń aıtýynsha, jańadan engiziletin avtobýs aqysyn tóleý júıesiniń otandyq ónim bolýy mańyzdy.
Sondaı-aq, atalǵan mekeme basshysy jolaqysyn tólemeıtin jolaýshylardyń úlesin aıtyp ótti.
«Jolaqysyn tólemeı júretinderdiń úlesi 10 -15 paıyzdy quraıdy», - deıdi ol.
CTS usynǵan aqparatqa súıensek, búginde elordanyń qoǵamdyq kóliktegi jolaýshylardyń ortasha aǵyny 600 myńnan astam adamdy quraıdy.
Jáne jolaýshylar tólemaqyny 2 jolmen óteı alady. Birinshi arnaıy kólik kartasy arqyly, ekinshi, smartfonnyń kómegimen QR-kodty skanerleý arqyly tóleýge bolady.
Odan basqa, Transcard, Kaspi.kz, Homebank jáne uıaly baılanys operatorlarynyń qosymshalary arqyly da qoǵamdyq kólik aqysyn jasaý múmkindigi bar.
Aıta keteıik, búginde elordada qoǵamdyq kólik quny 90 teńge turady jáne baǵa sońǵy 7 jyl boıy ózgergen joq.
Buǵan deıin habarlaǵanymyzdaı, Nur-Sultan qalasynda qoǵamdyq kólik aqysyn tóleýdiń jańa júıesi engiziledi.
