Avtobıznes qaýymdastyǵy ekologtarǵa aýa sapasyn taldaýǵa arnalǵan zerthana tabystady
NUR-SULTAN. QazAqparat - Búgin Qazaqstan avtobıznes qaýymdastyǵy men Qazaqstannyń ekologııalyq uıymdary qaýymdastyǵy arasynda ózara túsinistik pen yntymaqtastyq týraly memorandýmǵa qol qoıyldy, dep habarlaıdy QazAqparat tilshisi.
Memorandýmǵa qol qoıýshylar Qazaqstannyń «jasyl» ekonomıkaǵa kóshýi jónindegi tujyrymdamany iske asyrýdy jáne tómen kómirtekti damý qaǵıdattaryna kóshýdi qoldaı otyryp, Qazaqstan qalalarynda qorshaǵan ortany saýyqtyrý jónindegi birlesken sharalardy júzege asyrýǵa kelisti.
«Óńirlerdiń ornyqty damýynyń ekologııalyq quramdas bóligi olardyń aýmaqtyq damýynyń mańyzdy faktory sanalady. Óz kezeginde qorshaǵan ortanyń turaqty damýyn qamtamasyz etý – eldiń turaqty damý sharttarynyń biri. 2019 jylǵy atmosferalyq aýanyń jaı-kúıin baqylaý qorytyndysy boıynsha lastaný deńgeıi joǵary qalalarǵa: Nur-Sultan, Almaty, Óskemen jatady. Atmosferanyń lastanýyna kólikterdiń de áseri az emes. Bul oraıda Qazaqstandyq avtobıznes qaýymdastyǵynyń qoǵamdyq uıym bola otyryp, qorshaǵan ortaǵa aıtarlyqtaı kóńil bóletini qýantyp otyr», - dep atap ótti Qazaqstannyń ekologııalyq uıymdary qaýymdastyǵynyń basqarma tóraıymy Aıgúl Soloveva.
Memorandýmnyń birinshi kezektegi mindetterin oryndaý maqsatynda, ony Dúnıejúzilik qorshaǵan ortany qorǵaý kásipornyna ushtastyra otyryp, Qazaqstandyq avtobıznes qaýymdastyǵy Qazaqstannyń ekologııalyq uıymdarynyń qaýymdastyǵyna aýany ólsheý úshin eki mobıldi ekologııalyq zerthanaǵa sertıfıkat berdi.
«Biz -» Qazaqstandyq avtobıznes qaýymdastyǵy«, otandyq avtoóndirýshilerdi biriktirý retinde, árıne, óz eliniń azamattary retinde ekologııa jáne qorshaǵan ortany qorǵaý máselelerine muqııat qaraımyz. Sondyqtan bizdiń seriktesterimizdi damytýdyń basym baǵyttarynyń biri ekologııalyq taza avtomobılder, avtobýstar men arnaıy tehnıka óndirisi jáne ekologııalyq otyn túrleri. «Qazaqstannyń ekologııalyq uıymdarynyń qaýymdastyǵy« elimizdegi ekologııalyq jaǵdaıdy jaqsartý úshin kóp kúsh jumsaýda. Bizdiń birlesken kúshimiz osy ıgi iske kómektesedi dep úmittenemiz», - dedii Qazaqstan avtobıznes qaýymdastyǵynyń vıtse-prezıdenti Anar Maqasheva.
Otandyq óndiristiń jyljymaly ekologııalyq zerthanalary qazirgi zamanǵy jabdyqtarmen jasaqtalatyn jáne qalalyq kólik júıelerine keshendi taldaý júrgizýge jáne olardyń atmosferalyq aýanyń sapasyna áser etý deńgeıin anyqtaýǵa múmkindik beredi.
Jyljymaly stantsııalar sondaı-aq aýa synamalaryn alýǵa arnalǵan portatıvti qurylǵymen, lastaýshy zattardyń kontsentratsııasyn anyqtaýǵa arnalǵan jabdyqpen, jeke qorǵanys quraldarymen, navıgatsııa jáne baılanys qurylǵylarymen, kompıýterlermen jáne basqa da zerthanalyq jabdyqtarmen jabdyqtalady.
Qazaqstannyń ekologııalyq uıymdary qaýymdastyǵynyń baspasóz qyzmeti málimetinshe, eki jyljymaly stantsııa Nur-sultan men Almatyda júredi. Mobıldi zerthanalardyń arqasynda qazaqstandyq ekologtar atmosferalyq aýanyń sapasyn baqylaýdy júzege asyryp, lastanýdyń deńgeıi men negizgi sebepterin jedel anyqtaı alady.
