Avtobandar qysta nege qaýipti
ALMATY. QazAqparat - Almatyda ótken baspasóz máslıhaty barysynda «Qazjol ǴZI» AQ prezıdenti Baǵdat Teltaev Qazaqstandaǵy avtojoldardyń ahýaly týraly baıandap berdi, dep habarlaıdy QazAqparat tilshisi.
«Bizdiń ınstıtýt 3 jyl boıy Astana-Býrabaı tasjoly qurylysynyń ǵylymı-tehnıkalyq bazasyn qamtamasyz etip keledi. Jańa joldardy tóseýde jańa tehnologııalar paıdalanyldy. Joba 2006 jyly qolǵa alynyp, qurylys 2008 jyly bastalǵan edi. Bul tas joldyń sapasy óte joǵary. Biraq, kóptegen júrgizýshiler joldyń taıǵanaqtyǵyna shaǵymdanady», - dedi Baǵdat Teltaev.
Onyń aıtýynsha, bul máseleni ońtaıly sheshý úshin joldy tazalap turatyn mamandardyń sanyn arttyrý kerek.
«Joldy tek salyp qana qoımaı, onyń jaǵdaıyn baqylaý kerek. Arnaıy tazalaý tehnologııalary bar. Jol tazalaýshy mamandar aýa raıy boljamyn aldyn ala qarap otyrýy qajet. Jol qyzmetkerleri jol ýchaskelerin ylǵı tazalap otyrýy tıis. Ókinishke oraı, avtojoldardy paıdalaný úshin berilgen qarjy jetkiliksiz. Jol tazalanady. Biraq jetkilikti emes. Ol úshin qyrýar qarjy, mamandar, tehnıka kerek», - dedi ol.
«Qazjol ǴZI» AQ mamandary aıtqandaı, búginde Qazaqstanda asfalt-beton jabyndysymen 50-ge jýyq jol ýchaskesi salynǵan. Bul jumystardy júrgizý kezinde klımattyq erekshelikter eskerile otyryp, jańa materıaldar men tehnologııalar paıdalanylǵan.
