Avstrııalyq kompanııa Aqmola oblysynda keramıkalyq buıymdar shyǵaratyn zaýyt salmaq
Aqmola oblysy ákimdigi baspasóz qyzmetiniń málimetinshe, kompanııa ókilderiniń óńir basshysymen kezdesýinde ekijaqty yntymaqtastyqty damytý perspektıvalary talqylandy.
«Bizdiń ónerkásiptik áleýetimiz joǵary, búginde biz moıyntirekterdiń júz paıyzǵa jýyǵyn, árbir ekinshi astyq jınaıtyn kombaındy, úshinshi kg altyndy, úshinshi kirpishti, árbir jetinshi tonna ýrandy shyǵaramyz. Biz álemniń 90 elimen yntymaqtasamyz. Biz Avstrııamen jumys isteımiz. Bes aıdyń ishinde syrtqy saýda aınalymy shamamen 5 mıllıon AQSh dollaryna jetti. Bizdiń ózara is - qımylymyzdyń áleýeti zor dep sanaımyn», - dedi óńir basshysy.
Osy rette, aımaq basshysy Ermek Marjyqpaev oblystyq ınvestıtsııalyq jobalardy iske asyrý úshin barlyq máseleni talqylaýǵa daıyn ekenin atap ótti. Al «Lasselsberger Group» halyqaralyq korporatsııasynyń ókilderi aýdannyń da, oblystyń da ekonomıkasyn damytýǵa odan ári mýltıplıkatıvti áser etetin keramıkalyq buıymdar shyǵaratyn zaýyt salýǵa nıetti ekenin aıtty.
«Biz úshin eń bastysy – keramıka búıymdaryn shyǵaratyn óndiristi ashý. Eń bastysy – shıkizatty tabý. Biz sapasyz ónim shyǵaratyn kompanııa emespiz. Bizde búkil álem boıynsha 90-nan astam zaýyt bar. Biz úsh baǵytta jumys isteımiz: qaǵaz ónimderine, keramıkaǵa, shynyǵa arnalǵan mıneraldar shyǵaramyz. Ekinshi baǵyt – keramıka óndirisi, al úshinshi baǵyt – qurylys materıaldary. Biz tsement, qurǵaq qurylys qospalary, jelim jáne basqalaryn shyǵaramyz, ol ǵımarattyń ishinde de, syrtynda da bezendirý úshin qajet», - dep atap ótti kompanııa ıesi Iozef Lasselsberger.
«Lasselsberger Group» – álemniń 17 elinde 67 óndiristik kásiporny bar jáne shıkizat, qurylys materıaldary men keramıkalyq buıymdar óndirý boıynsha Eýropadaǵy jetekshi kompanııalardyń biri.
«Mundaı jobalar bizdiń oblysymyz úshin óte mańyzdy. Óz tarapymyzdan biz barlyq másele boıynsha barynsha qoldaý kórsetýge árqashan daıynbyz. Mundaı kezdesýlerdi ótkizý ózara tıimdi yntymaqtastyqty nyǵaıtatynyna senimdimin», - dep qorytyndylady Ermek Marjyqpaev.
Aıta ketsek, budan buryn Sandyqtaý aýdanynda 4 mıllıard teńgeniń ınvestıtsııalyq jobalary júzege asyp jatqanyn jazǵan edik.
