Avstrııalyq baıqaýshy Qazaqstandaǵy saılaýda múgedekter quqyǵyn tıimdi jetildirýdi usyndy
ASTANA. QazAqparat - Saılaý Qazaqstannyń úlken progreste ekenin ańǵartty. Búgin Parlament Májilisi men máslıhat depýtattarynyń saılaýyna arnalǵan brıfıngte halyqaralyq baıqaýshy, EQYU Parlamenttik Assambleıasynyń burynǵy tóraǵasy, Avstrııa Parlamenti Ulttyq keńesiniń burynǵy depýtaty Volfgang Grossrýk osylaı málim etti.
«Qazaqstandaǵy saılaý barysyn baıqaýǵa alǵash ret 2014 jyly kelgen edik, Almatyda bolǵanbyz. Bizdiń baıqaýǵa qatysty tájirıbelerimiz barshylyq. Sondyqtan da, bul saılaýdyń sapalylyq jaǵynan jetilgenin aıtýǵa bolady. Bastapqy jyldary saılaý komıssııalarynan bastap, saılaýshylarǵa deıin problemalar oryn alyp turatyn. Qazir úlken progresti baıqadyq», - dedi Volfgang Grossrýk.
Sarapshynyń aıtýynsha, saılaý ýchaskelerindegi uıymdastyrý deńgeıi asa joǵary sapaǵa saı keledi. «Biz saılaýshylar tarapynan syn aıtylatyn shyǵar dep kútken edik. Alaıda, bári tynysh ótti. Sondyqtan da, saılaý úderisi úlken damý deńgeıinen ótti dep málimdeı alamyz», - dedi ol. Onyń sózine qaraǵanda, saılaýǵa qatysty basqa partııa ókilderi de eshqandaı syn-eskertpeler men shaǵymdar aıtqan emes. «Biz kútken jaǵdaılardyń bári jaǵymdy sıpatqa ıe boldy. Bir ǵana pýnkt boıynsha syn bar: máselen múgedekterdiń quqyqtary baǵytyn áli de jetildirýge bolatyn edi. Mysaly, Avstrııada ondaı múmkindigi shekteýli azamattar saılaý ýchaskesine kele almasa olar hat arqyly daýys bere alady. Bundaı úderis Eýropada da bar. Sondyqtan da, mundaı shara Qazaqstanda kelesi saılaýǵa deıin enetinine senim bildirgim keledi», - dedi Volfgang Grossrýk.
Sóz sońynda sarapshy Qazaqstan halqyn qonaqjaılylyǵy úshin jáne joǵary uıymdastyrýshylyqtary úshin alǵysyn jetkizdi.
