Avstrııadaǵy jasóspirimderdiń І Qysqy Olımpıada oıyndarynda Qazaqstan quramasy 15-inshi orynda keledi
ALMATY. 16 qańtar. QazAqparat /Erlik Erjanuly/ - Búgin Avstrııanyń Insbrýg qalasynda ótip jatqan jasóspirimderdiń І Qysqy Olımpıada oıyndary aıasynda sporttyń 4 túri boıynsha medaldardyń 8 toptamasy sarapqa túsip jatyr.
Alǵashqy 2 kúnniń qorytyndysy boıynsha, 70 eldiń 19-y ǵana óz qorjyndaryna alǵashqy medaldardy sala aldy. Bul tizimdi 2 altyn, 1 kúmis, 12 qola júldemen Germanııa bastap tur. Ekinshi oryndy 2 altyn jáne 1 kúmispen Qytaı sportshylary ıelense, úzdik úshtikti túıindegen Japonııanyń qorjynynda 2 altyn, 4 qola bar.
Burynǵy keńestik respýblıkalar arasynda árqaısysy bir-bir kúmis oljalaǵan Qazaqstan, Belarýs, Latvııa jáne Estonııa elderi 15-inshi oryndy ózara bólisip tur. Olardy jalǵyz qola ıelengen Andorra, Nıderlandy, Reseı quramalary ókshelep keledi. 13-22 qańtar aralyǵynda ótetin bul dúbirli dodada medaldardyń jalpy 63 jıyntyǵy oınatylady. Onyń altaýy 14 qańtar kúni sarapqa salynyp, olar óz ıelerin tapty. Onda frantsýz taý shańǵyshysy Estel Alfan jasósprimderdiń І Qysqy Olımpıadasynyń tuńǵysh chempıony atandy. Estal sýpergıgantta 1 mınýt 5,78 sekýnd ýaqyt kórsetkishimen úzdik shyqqan edi. Al qazaqstandyqtar arasynan alǵashqy júldeni bıatlonshy Galına Vıshnevskaıa ıelendi. 15 qańtarda sportyń bul túrinen medaldardyń 2 jıyntyǵy óz ıelerin tapty. Atap aıtqanda, 6 shaqyrymdyq jarysta nemis qyzy Frantsıska Preýsstyń baǵy jandy. Al qazaqstandyq G. Vıshnevskaıa - kúmis, reseılik Ýlıana Kaısheva - qola júldeger atandy.
