Avstrııada shańǵyshy 5 saǵat boıy qar kóshkini astynda jatqan
NUR-SULTAN. QazAqparat – Avstrııalyq qutqarýshylar bes saǵat boıy qalyń qar astynda jatqan 26 jastaǵy shańǵyshyny aman-esen shyǵaryp aldy, dep habarlaıdy BBC.
Shańǵymen syrǵanaýǵa ketken 26 jastaǵy er adamnyń qaıta oralmaǵandyǵy jaıynda polıtsııaǵa onyń joldasy aıtqan.
Ol shańǵyshynyń uıaly telefonyna qońyraý shalǵan, biraq jelide tek shýyldaǵan dybys ǵana estilgen.
Qutqarýshylar onyń Pleshnıtstsınke taýy bókteriniń qaı jerinde jatqanyn elektrondy transıverdiń kómegimen eki saǵattan soń tapqan.
Grobmıngtiń birneshe qutqarýshylary men jergilikti polıtsııa úsh saǵat boıy qardy arshyp, er adamdy shyǵaryp aldy. Salqyn tıgen shańǵyshy shuǵyl aýrýhanaǵa jetkizildi.
Qutqarýshylardyń biri Shtefan Shrektiń aıtýynsha, qardyń astynda bes saǵat boıy jatý óte sırek kezdesetin oqıǵa. Mundaı jaǵdaı Avstrııada jıyrma jyldyń ishinde bir ret qana bolýy múmkin. Óıtkeni qalyń qar astynda otteginiń jetispeýinen 15 mınýttan keıin tiri qalý múmkin emes.
«Onyń joly boldy. Óıtkeni qar astynda edáýir úlken «aýa qaltasy» paıda bolǵan», -deıdi qutqarýshy Ferdınand Prenner.
