Avstrııada Rahat Álıevtiń ústinen is qozǵaldy
ASTANA. 12 shilde. QazAqparat - Avstrııada Qazaqstannyń Venadaǵy burynǵy elshisi Rahat Álıevtiń ústinen bopsalaý maqsatynda adam urlady jáne óltirdi degen aıyptaý boıynsha qylmystyq is qozǵaldy.
Avstrııa prokýratýrasy Rahat Álıevtiń isi boıynsha tergeýdiń shilde aıynyń basynda bastalǵanyn qýattady, dep habarlaıdy RBK.
R.Álıev eki bankırdi urlady jáne olardy óltirdi dep aıyptalyp otyr. Qazaqstanda ol osy qylmystary úshin kináli dep tanylyp, syrttaı úkim shyǵarylǵan.
Prokýratýra ókiline silteme jasap Avstrııa BAQ-tarynyń habarlaýynsha, Avstrııa ókimeti R.Álıevtiń qaıda ekenin bilmeıdi. Prokýratýranyń aqparaty boıynsha, R.Álıevtiń Avstrııada ne bosqyn mártebesi nemese turýǵa quqyǵy joq. Onyń sońǵy kezderi Maltada turyp kelgeni jáne Avstrııaǵa oralmaq emes ekeni habarlandy.
Qazaqstan ókimeti Rahat Álıevti ustap berý týraly avstrııalyq áriptesterine eki ret ótinish jasap, eki ret teris jaýap alǵan edi. Qaza bolǵandardyń týystary R.Álıevtiń ústinen Avstrııa sotyna aryz berdi. Birneshe jylǵa sozylǵan bul istiń túıini sheshiler kúni áli alystaý.
Avstrııalyq birqatar saıası jáne qoǵamdyq qaıratkerler áreketsizdigi jáne qylmyskerge pana berip otyrǵany úshin ókimetti synap, R.Álıevti sotqa tartýdy talap etken bolatyn. Naýryz aıynda Eýropalyq komıssııa Avstrııa prokýratýrasyna Álıevtiń isi týraly saýal joldaǵan edi.
