Avstrııada ótken jasóspirimderdiń І Qysqy Olımpıada oıyndarynda qazaqstandyqtar 23-inshi oryn aldy
ALMATY. 23 qańtar. QazAqparat /Erlik Erjanuly/ - Qańtardyń 13-22 kúnderi Avstrııanyń Insbrýk qalasynda ótken jasóspirimderdiń І Qysqy Olımpıada oıyndarynda Qazaqstan quramasy jalpy komandalyq esepte 23-inshi oryn aldy.
14-18 jastaǵy jastar men jasóspirimder arasyndaǵy baıraqty básekege 70 memleketten 1 myńnan astam sportshy qatysqan bolatyn. Onda sporttyń 15 túri boıynsha medaldardyń 63 jıyntyǵy sarapqa salynǵan edi. Óz qorjyndaryna 8 altyn 7 kúmis, 2 qola medal salǵan Germanııa sportshylary 1-inshi oryn aldy. 7 altyn, 4 kúmis, 4 qolamen Qytaı ekinshi oryn alsa, jarys qojaıyndary 6 altyn, 4 kúmis, 3 qolamen úzdik úshtikti túıindedi.
Al 36 qazaqstandyqtar bul dodada sporttyń 10 túri boıynsha baq synap, 1 kúmis, 2 qola medalmen 23-inshi orynǵa taban tiredi. Eger 30 eldiń sportshylary ǵana júldeli orynǵa ıe bolǵanyn eskersek, bul kóńil qýantarlyq jetistik. Óıtkeni kórshiles elderden tek Reseı (5) ǵana bizdiń aldymyzda tur. Ulttyq qurama erteń tańǵa jýyq Frankfýrt-Almaty áýe baǵytymen elge oralady.
