Avstrııada ótetin jasóspirimderdiń І Qysqy Olımpıada oıyndarynda el namysyn 36 sportshy qorǵaıdy
ALMATY. 6 qańtar. QazAqparat /Erlik Erjanuly/ - Qańtardyń 13-22 kúnderi Avstrııanyń Insbrýk qalasynda jasóspirimder arasynda І Qysqy Olımpıada oıyndary ótedi.
Baıraqty básekege 60 memleketten 14-18 jas aralyǵyndaǵy bir myńnan astam sportshy qatyspaq. Olımpıadalyq 15 sport túri boıynsha ótetin dodada medaldardyń 63 jıyntyǵy sarapqa salynady. QR Týrızm jáne sport mınıstrligi Sport komıtetiniń Ulttyq shtattyq komandalar jáne sport rezervi dırektsııasynyń baspasóz hatshysy Ardaq Toǵymovtyń aıtýynsha, Qazaqstan namysyn 36 sportshy qorǵaıtyn bolady. Olar sporttyń 10 túri boıynsha básekege túsedi.
Eske salaıyq, 2010 jyly Sıngapýrde ótken jasóspirimder arasyndaǵy І Jazǵy Olımpıada oıyndarynda sporttyń 29 túri boıynsha 90 medal sarapqa salynyp, oǵan Qazaqstannan sporttyń - jeńil atletıka, júzý, jaǵajaı voleıboly, sýǵa sekirý jáne oq atý túrlerinen 34 sportshy qatysty. 45 elden kelgen 1,5 myń sportshynyń arasynda bolǵan baqtalasta Qazaqstan quramasy 2 altyn, 2 kúmis jáne 2 qola medal oljalady.
