Avstrııada mıgranttar mingen avtobýs polıtsııadan qashyp bara jatyp, apatqa ushyrady
NUR-SULTAN. QazAqparat – Avstrııa men Slovakııa shekarasynda mıgranttardy alyp bara jatqan shaǵyn avtobýs apatqa ushyrady. Sonyń saldarynan 3 adam mert boldy, dep habarlaıdy QazAqparat Euronews.com saıtyna silteme jasap.
«Baqylaý beketinde tekserý úshin polıtsııa kólikti toqtatpaq boldy. Alaıda júrgizýshi tártip saqshylarynyń talabyna baǵynbaı, jyldamdyqty arttyryp, polıtsııadan qashpaq boldy. Avtobýs júrgizýshisi kólikti basqara almaı, joldan shyǵyp ketip, jol jıegindegi aryqqa baryp qulady»,-dedi Býrgenland provıntsııasynyń polıtseıi Gelmýt Marban.
«Biz kelgende avtobýsta 20 mıgrant boldy. Olardyń úsheýine kómektesý qajet bolmaı qaldy. Óıtkeni olar apat saldarynan mert boldy. Bireýi áıel, ekeýi er adam. Jeti adam aýyr jaraqat alǵan, olar jaqyn aradaǵy aýrýhanalarǵa jetkizildi. Keıbireýin tikushaqpen jetkizý qajet boldy»,-dep tolyqtyrdy tártip saqshysy.
Shaǵyn avtobýs mıgranttardy adam saýdasymen aınalysatyndar kóp júretin baǵyttardyń birimen zańsyz tasymaldamaq bolǵan. Jolaýshylardyń ishinde balalar da bar. Avtobýs júrgizýshisi qamaýǵa alyndy.
Aldyn ala málimetter boıynsha, júrgizýshi Reseı azamaty. Polıtsııa avtobýstaǵy mıgranttardyń týǵan jeri men aty-jónderin anyqtap jatyr.
