Avstrııada mektepte atys boldy: qaza tapqandar men jaralanǵandar bar

ASTANA. KAZINFORM – Avstrııanyń Grats qalasyndaǵy orta mektepke qarýly shabýyl jasaldy. Ókinishke qaraı 10 adam, onyń ishinde shabýyl jasaýshynyń ózi de, qaza taýyp, 12 adam jaralandy, dep jazdy Anadoly agenttigi. 

Polıtsııa ókili Frıts Grýndnıgtiń aıtýynsha, qarýly shabýyl Grats qalasyndaǵy Draıershıýttsengasse kóshesinde ornalasqan mektepte jasalǵan.

Aqparat boıynsha, oqıǵa saldarynan 10 adam, sonyń ishinde shabýyl jasaýshy da, kóz jumdy.

Osy oqıǵaǵa baılanysty Premer-mınıstr Krıstıan Shtoker barlyq is-sharalaryn toqtatyp, Іshki ister mınıstri Gerhard Karner oqıǵa orny – Grats qalasyna bardy.

Jergilikti BAQ-tyń habarlaýynsha, shabýyldan 9 adamdy óltirgen qylmysker keıin mekteptiń ájethanasynda ózin-ózi óltirgen. Málim bolǵandaı, ol mekteptiń burynǵy oqýshysy bolǵan jáne býllıngke (qysymǵa) ushyraǵan.

Shtırııa federaldy polıtsııasy (Grats qalasy osy aımaqqa kiredi) áleýmettik jeli X paraqshasynda jarııalaǵan málimdemesinde jaǵdaı baqylaýǵa alynǵanyn jáne qaýip seıilgeni habarlandy. Jaraqat alǵandar aýrýhanalarǵa jetkizildi, aımaqqa qosymsha polıtsııa bólimsheleri jiberildi, mektep evakýatsııalandy.

Prezıdent Aleksandr Van der Bellen X áleýmettik jelisinde: «Bul sumdyqty sózben jetkizý múmkin emes. Búgin Gratstaǵy mektepte bolǵan oqıǵa elimizdiń júregine aýyr soqqy boldy», – dep jazdy. Ol zardap shekkenderge kóńil aıtyp, janashyrlyq bildirdi.

Premer-mınıstr Krıstıan Shtoker bul oqıǵany «ulttyq tragedııa» dep atap, búkil elge úlken kúızelis ákelgenin, qaza tapqandarǵa kóńil aıtatynyn jetkizdi. Shtoker: «Avstrııanyń búgingi kúıin sózben jetkizý múmkin emes», – dep, búkil el atynan birlik pen qoldaý bildirdi.

Elde qaraly kún jarııalandy

Oqıǵa ornyna barǵan Premer-mınıstr Shtoker men Іshki ister mınıstri Karner baspasóz máslıhatyn ótkizdi. Onda 10 adamnyń, onyń ishinde shabýyl jasaýshynyń da qaza tapqany rastaldy.

Premer-mınıstr bul shabýylǵa baılanysty elde úsh kúndik qaraly kún jarııalanǵanyn málimdedi.

Mınıstr Karnerdiń aıtýynsha, qaza tapqan 9 adamnyń altaýy qyz bala, úsheýi ul bala, al shabýyldaýshy – sol mekteptiń burynǵy oqýshysy.

Mınıstrdiń sózine qaraǵanda, keminde 12 adam jaralanyp, olardyń keıbiriniń jaǵdaıy aýyr.

Polıtsııa ókili Djerald Ortnerdiń aıtýynsha, shabýyl jasaǵan adam shabýyldan keıin mekteptegi ájethanaǵa baryp, ózin-ózi atyp óltirgen.

Ortnerdiń málimdeýinshe, kúdiktiniń buryn sotty bolmaǵan, ol shabýyldy lıtsenzııalanǵan uzyn qarý men tapansha arqyly jasaǵan. Kúdikti – Grats qalasy mańyndaǵy 21 jastaǵy Avstrııa azamaty. Qazir tergeý jumystary jalǵasyp jatyr.

Aıta keteıik, buǵan deıin jergilikti BAQ adamdardyń qaza tapqan jáne segiz adamnyń jaraqat alǵanyn habarlaǵan edi. Sonymen qatar, atys ashqan oqýshy óz-ózine qol jumsaǵan bolýy múmkin delingen edi.

Eske sala keteıik, buǵan deıin Moldova prezıdentiniń ıti Avstrııa prezıdentin tistep alǵanyn jazǵan edik.