Avstrııada quny €160 myń turatyn kartınany tapa-tal túste urlap ketken
ASTANA. QazAqparat - Avstrııa polıtseıleri frantsýz sýretshisi, ımpressıonıst Per Ogıýst Renýardyń «Golfe, Mer, Falaises Vertes» (Shyǵanaq, teńiz, jasyl jartastar) kartınasynyń urlanýyna kúdikti úsh adamǵa izdeý jarııalady.
Quny 160 myń eýro turatyn polotno Venadaǵy Dorotheum aýktsıon úıinen urlanǵan.
Aldyn ala boljamǵa qaraǵanda, úsh kúdikti dúısenbi, 26 qarashada jergilikti ýaqyt boıynsha shamamen saǵat 17:15-te aýktsıon ótkiziletin úıge kelgen. Olar kartınany jaqtaýynan eshkimge baıqatpaı alyp, árqaısysy ǵımarattyń ár esiginen shyǵyp, izderin sýytqan, dep habarlaıdy avstrııalyq ORF telearnasy.
Kúdiktilerdiń úsheýi de vıdeobaqylaýǵa túsip qalǵan. Polıtseılerdiń paıymynsha, olar kórkemóner zattaryn urlaýǵa beıimdelgen urylar bolýy yqtımal.
